Li Rojhilat û Îranê çalakiyên li dijî krîza aborî veguhest serhildanê. Di roja 12an de jî gelên li Rojhilat û Îranê tev li greva giştî bûn û dikanên xwe venekirin.
Çalakiyên li rojhilatê Kurdistanê û Îranê ku di 28ê kanûna 2025an de ji ber krîza aborî dest pê kirî, di roja 12emîn de jî berdewam kir. Îro li seranserê Rojhilat û Îranê greva giştî hat ragihandin û di vê çarçoveyê de li gelek bajaran welatiyan dikanên xwe venekirin. Welatiyên ku dikanên xwe venekirin, piştî danê êvarê derketin kolanan û bi girseyî çalakî li dar xistin. Hêzên rejîmê bi gazên çavsoj û çekan êrişê çalakvanan kirin û gelek welatî birîndar bûn.
Li bajarê Îlamê yê rojhilatê Kurdistanê çalakiyên li dijî krîza aborî veguhest serhildana li dijî desthilatdariya rejîma Îslamî ya İranê. Ji roja destpêkê heta niha çalakiyên li Îlamê roj bi roj mezintir dibe û hêzên rejîmê li ber çalakvanan bêbandor dimîne. Di roja 12an a çalakiyan de jî çalakvanên Îlamê bi ser Bankaya Neteweyî ya Îranê de girt û hemû qeyd û belgeyên deynên gel li ser bûn şewitandin. Çalakiyên li Îlamê bênavber didomin û di hemû tax û kolanan de gel li ser pêyan e.
Li gorî Rêxistina Mafên Mirovan Hengawê bajarê Darajê ya vîlayeta Kirmanşahê ji aliyê hêzeke mezin a rejîmê ve hatiye dorpêçkirin û hêzên rejîmê guleyan berdidin bi ser malên welatiyan. Li gorî Hengawê gelek welatî birîndar bûne û rewşa wan xetere ye.
Her wiha li bajarên Îslamabad û Gîlanê jî hêzên rejîmê bi keleş û çifteyan artêş welatiyan kirin û gelek welatî bi giranî birîndar bûn. Li bajarê Khoramabadê înternet bi temamî hat birîn û hêzên rejîmê bi çekên nîvgiran êrişî çalakvanan kirin.
Li Tehranê jî danê êvarê bi deh hezaran kes derketin kolanan û çalakî li dar xistin. Li gelek taxên Tehranê di navbera hêzên rejîmê û çalakvanan de pêvçûn derketin û çalakvanan bi dehan wesayîtên hêzên rejîmê şewitandin.
Di roja 12an de gelê Ûrmiyeyê jî tev li grevê bûn û cara ewil derketin qadan. Gelê ku piştî grevê çalakî li dar xistin, bi girseyî çalakiyên xwe didomînin.
