Berxwedana Şêxmeqsûd, Eşrefiyê û Benî Zêd a li hemberî êrişên komên çeteyên girêdayî Hikûmeta Demkî ya Şamê didomin, li 4 bajarên kantona Cizîrê hat silavkirin. Di meşan de peyama domdarkirina têkoşînê li hemberî hemû cureyên tundiya dagirekeriyê hate dayîn.
Şêniyên bajarên Til Hemîs, Girkê Legê, Dêrik û Holê yên kantona Cizîrê bi çalakiyên cûda berxwedana gelê Şêxmeqsûd, Eşrefiyê û Benî Zêd ya li hemberî êrişên komên çete yên hikumeta demkî û yên dewleta Tirk a dagirker silav kir û piştgiriya xwe anî ziman. Şêniyên bajarê Til Hemîsê ji bo şermezarkirina êrişên li ser her sê taxan û silavkirina berxwedana gel meşek li dar xist. Girseya ji pêşiya avahiya meclisa bajar ber bi çerxerêya qeracê ve meşiyan, wêneyên ku sûcên çeteyên yên li dijî welatiyan kirine rakirin û pankartên “Dest kuştina zarokan berdin” û “Kanê rêxistinên mafên mirovan?” vekirin.
Berxwedana dîrokê hate silavkirin
Girse li çerxerêya qeracê deqeyek rêz girt û piştre axaftin hatin kirin. Ji rêveberên Kongra Star Melka El Mihemed axivî û got: “Em bejna xwe li hemberî yek ji mezintirîn berxwedanên dîrokî ditewînin, berxwedana ku bi xwîna şehîdan û sebra gel hatiye nivîsandin, îspat kir ku îradeya azad ji hemû amûrên kuştin û dorpêçkirinê xurttir e.” Hevseroka Navenda Perwerdehiyê ya Til Hemîsê Lîdiya El Îsa jî got: “Berxwedana Şêxmeqsûd û Eşrefiyê berdewama berxwedana Bendava Tişrînê ye û tiştê ku diqewime ne pevçûnek asayî ye, lê êrişek li ser jiyan û rûmeta mirovan e.”
‘Êrişan biryardariya me xurtir kir’
Meşa Dêrikê ji Qada Azadî dest pê kir, beşdaran wêneyên şehîdên berxwedana her du taxan hilgirtin. Dema ku gihîştin Navenda Kongra Star li bajêr û piştî deqeyek rêzgirtinê, li ser navê koçberên Efrîn û Şahbayê, Meryem Mehmûd axivî û berxwedana şênyên taxên Şêxmeqsûd û Eşrefiyê û Hêzên Ewlekariya Hundirîn silav kir. Meryem got, “Em ê neşikên, berevajî vê biryardariya me dê xurttir bibe û em ê li dijî hemû komployan bisekinin.” Xwepêşandan bi dirûşmeyên şermezarkirina komkujî û êrişên li dijî şêniyên taxên Şêxmeqsûd û Eşrefiyê bi dawî bû.
Gel bi berxwedanê serbilind e
Li bajarê Girkê Legê, meşa ku şêniyên bajar, bajarokê Rimêlan û koçberên ji Efrînê beşdar bûn, ji Qada Şehîd Xebat dest pê kir û li kolana sereke berdewam kir. Beşdaran pankartên “Bijî berxwedana Şêxmeqsûd û Eşrefiyê” vekirin. Piştî deqeyek rêzgirtinê ji rêveberên Partiya Yekîtiya Demokratîk (PYD), Îdrîs Mela Şerîf axivî û berxwedana gelê Şêxmeqsûd û Eşrerfiyê silav kir û diyar kir ku gel bi vê berxwedanê serbilind e.
Endama Meclîsa Bajarê Qamişlo, Menal El Elî diyar kir ku sûcên li dijî taxên Şêxmeqsûd û Eşrefiyê hatine kirin binpêkirineke eşkere ya mafên mirovan e. Menal bang li civaka navneteweyî kir ku hesabê ji sûcdaran bipirse û piştgiriya şêniyên her du taxan bike.
Meş bi dirûşmên silavkirinê berxwedanê bi dawî bû
Derbarê heman mijarê de li bajarê Holê jî daxuyaniyek ji hêla hevseroka Meclisa Partiya Sûriyeya Pêşerojê ya Holê, Fatma El Hisên ve hate xwendin. Bi dehan şênî û endamên partiyê tev li çalakiyê bûn. Di daxuyaniyê de berxwedana şêniyên Şêxmeqsûd û Eşrefiyê hat silavkirin û hat gotin ku ev êriş nîşan dide ku hikûmeta demkî peymanên 10`ê Adarê û 1`ê Nîsanê binpê dike.
