DAKAP û Tora Têkoşîna li Dijî Tundiyê ji bo şermezarkirina êrîşên li ser taxên Şêxmeqsûd û Eşrefiyê li Amedê daxuyanî dan çapemeniyê.
DAKAP û Tora Têkoşîna li dijî Tundiyê li ber Mizgefta Uluyê ya navçeya Sûrê ya Amedê ji bo şermezarkirina êrîşên li ser taxên Şêxmeqsûd û Eşrefiye yên Helebê daxuyanî dan çapemeniyê. Hevserokên DEM Parti, DBP, hevşaredarên Bajarê Mezin ên Amedê û navçeyan, Tevgera Jinên Azad, Dayîkên Aştiyê, nûnerên saziyên sivîl û platformên jinan tevlî daxuyaniyê bûn. Di çalakiyê de dirûşmên “Jin Jiyan Azadi” , “Rojava Rojhilat e Kurdistan yek welat e” , “Bijî berxwedana Rojava” hatin berzkirin. Li ser navê DAKAPê Çagla Sanay daxuyanî xwend.
Çagla Sanay diyar kir ku HTŞ û komên girêdayî wê, bêyî ku cudahiyê bixin navbera gelên Kurd û yên din li dijî taxên Helebê êrîş dane destpêkirin. Çagla Sanay anî ziman ku êrîş gihîştine asteke hovîtiyanli hemberî jinan. Çagla Sanany destnişan kir ku ev êrîşan provayên serdestiyekê ne ku tê xwestin di ser bedena jinê re bê avakirin û nîşaneyên rejîma zordest in ku hewl tê dayîn li Rojhilata Navîn bê sazkirin û wiha axivî: “Sûriye, ji aliyê dîrokî ve xwedî pêkhateyeke pirçandî ye. DAIŞ, li dijî elewî, durzî û hemû nasname û baweriyên cuda yên li herêmê ji bo xwe wekî gef dibîne û rûmeta mirovahiyê careke din li wir binpê dikin. Ev îdeolojiya tarî ya ku qadên jiyanê yên jinan teng dike, azadiyên wan sînordar dike û wan mehkûmî xeleka tundiyê dike, bi vê hovîtiya ku pêk tîne hewl dide çavê hemû jinan û mirovahiyê bitirsîne. Ev barbarî ya ku di bin navê “exlaq” û “pergalê” de tê meşandin, nîşaneya tarîtiya Serdema Navîn a li roja me ya îro ye. Em pir baş dizanin ku; kuştinên jinan polîtîk in. Kiryarên van kuştinan ne tenê ew destên ku çek an jî kêrê digirin in; ew hişmendiya baviksalar a li dijî jinê ye ku wan destan wêrek dike.”
Bang li cîhanê hate kirin
Çagla Sanay di dawiya daxuyaniyê de bang li cîhanê û hemû saziyên siyasî û sivîl kir û got: “Banga me ne tenê ji hêzên navneteweyî ên cîhanê re ye, ne jî ji bo wan welatên ku polîtîkayên durû dimeşînin û mafên mirovan û demokrasiyê di gotinê de dihêline. Banga me ji bo rêxistinên jinan, çalakgerên çepgir, sosyalîst û femînîst e ku dê hêzê bidin têkoşîna jinê û piştevaniya jinan xurt bikin. Werin em binpêkirinên mafên mirovan ên li Helebê û li herêmên di bin kontrola HTŞê de teşhîr bikin. Li hemberî ev şerê qirêj û serdestiya paşverû ya ku di ser bedena jinan re tê meşandin, li her devera cîhanê edaletê biqîrin.”
Daxuyanî bi dirûşmeya “Jin jiyan azadî” bi dawî bû.
