Hemserekê DBP’yî û DEM Partî yê Wanî vera hêrişanê taxanê Helebî reaksîyon mojna û vat: “Dinya çimê xo qirkerdişî ke bi destê dewletanê hegemonîk yenê kerdene, girewtê û huqûqê mîyanneteweyî yenê binpaykerdene.”
Mabênê 6 û 11ê çele de çeteyê HTŞ û SMO’yî taxanê kurdan Şêxmeqsûd, Eşrefîye û Benî Zêdî yê Helebî ser o hêrişê qirkerdişî kerdî. Hêz û dewletê mîyanneteweyî zî vera nê hêriş û qirkerdişan bêveng mendê. Hemverê nê hêrişan vakurê Kurdîstan û Tirkîya de xeylê çalakî virazîyayê û hema zî dewam kenê. Hemsereka Partîya Herêmanê Demokratîk (DBP) a Wanî Gonul Uzunay û Hemsereka Partîya Têduştî û Demokrasî ya Şaran (DEM Partî) a Wanî Gulşen Kurt derheqê hêrişanê qirkerdişî yê ke vera şarê Rojava ameyê kerdene, qisey kerd.
‘Hedefê înan destkewteyê kurdan ê’
Hemsereka DBP’yî ya Wanî Gonul Uzunay ard vîrî ke 6ê çele de bi destê çeteyanê HTŞ’yî yê ke amblemê DAIŞ’î cilanê înan ser o bîbî, taxanê kurd ê Helebî ser o hêrişê giranî kerdî û vat: “Yeno vînayîş ke nê hêrişan de destê çend dewletan zî est ê. Amancê nê hêrişan o taybet qirkerdişê şarê kurdî yo. Wazenê destkewteyanê kurdanê Rojava ke bi pêşengîya cinîyanê kurd û enternasyonal ameyê qezenckerdene, orte ra wedarnê û averşîyayîşê kurdan bidê vidarnayene. Parîs de binê sîwana Amerîka de mabênê Şam û Îsraîlî de peymanêk ameye îmzakerdene. Na peymane pêşkeşkerdişê Sûrîye ya seba Îsraîlî bîye. Dimayê na peymane nê hêriş û qirkerdişî ameyê destpêkerdene.”
‘Ma zanê seba çi cinîyan kenê hedef’
Gonul Uzunay dîyar kerd ke dîmenê medya dijîtal mojnenê danê ke di şexsê şarê kurdî de bi taybetî cinîyê kurdî hedef ameyê girewtene û wina vat: “Ma zanê seba çi cinîyan hedef gênê. Semedo ke şorişê Rojava de binkewtişê DAIŞ’î bi pêşengîya cinîyan ame kerdene. Cinîyanê kurd bi felsefeya ‘Cinî, Cuye, Azadîye’ ti game apey nêeşte. Ganî no baş bêro zanayîş, kurdêk dejêk bianco zerrîya kurdanê çar hetan û Anatolya zî dejena. Her çend seserrî ra ver Kurdîstan ameyo perçekerdiş zî zerrîya kurdan, fikrê kurdan, zikrê kurdan yew o.”
‘Rojava de cuyêka birûmet û azade ameya awankerdene’
Hemsereka DEM Partî ya Wanî Gulşen Kurt zî da zanayîş ke no şer o ke Rojava de yeno rayraberdene bi zîhnîyeto kapîtalîst, hegemonîk û faşîst ameyo kerdene û nê çîyî vatî : “No 13 serrî yo Rojava de şaro kurd, suryan û ereb hemînan têdir cuyêka birûmet û azade awan kerda û ciwîyenê. Erdê Sûrîye yê kurdan, sûryanîyan, durzîyan û pêroyê şaranê uca yo. Heqê înan est o ke serê erdê xo de xo rayra berê û rêxistin bikerê. La çi heyf ke ma vînenê ke dewletê hegemonîkî heme hetan ra semedê menfeatê xo şaran qir kenê. Sere de şarê kurdî qir kenê. No nîno qebulkerdene..
‘Dinya çimê xo girewtê û huqûqê mîyanneteweyî ameyo binpaykerdene’
Gulşen Kurt îfade kerd ke cuya ke Rojava de ameya awankerdene, rûmetê merdimîye paweno û no pîya ciwîyayîşê şaranê bindestan o û vat: “Cuyêka azade û birûmete heqê heme şaran a. Dinya çimê xo nê qirkerdişî ke bi destê dewletanê hegemonîk ameyê kerdene, girewtê. Huqûqê mîyanneteweyî ameyo binpaykerdene. Ma her hetî ra paştî danê şaranê Rojava. Na cuya ke Rojava de ameya awankerdiş tena seba kurdan nê, seba heme cinîyan, ciwanan û heme şaran cuyêka bi rûmet a. Nê esasî ser o ganî her çar hetê Kurdîstanî bibê yew û têdir têbigêrê.”
