Mêrdîn – Komeleya Wêjekarên Kurd a Mêrdînê bi hevkariya DEM Partiyê li navçeya Stewrê panela bi navê “Wêje û Mirov” li dar xist. Beşdaran diyar kir ku wêje ew e ku mirov bikare civaka xwe bi êşên xwe bihesîne.
Komeleya Wêjekarên Kurd a Mêrdînê bi hevkariya DEM Partiyê li avahiya DEM Partiyê ya Stewrê ya Mêrdînê panela bi navê “Wêje û Mirov” li dar xist. Di panela ku moderatoriya wê nivîskar Feratê Dengîzî kir de siyasetmedar Gulseren Yildirim û helbestvan Sabrî Vûral axivîn. Endam û rêveberên Komeleya Wêjekarên Kurd, DEM Partiyê û gelek kes beşdarî panelê bûn.
‘Ziman bingeha hemû nirxan e’
Di panelê de ewilî siyasetmedar Gulseren Yildirim axivî. Gulseren Yildirim diyar kir ku hezkiriyeke zimanê xwe yê dayikê ye û wiha got: “Ji ber ku ez dizanim ziman bingeha hebûna mirov e, bingeha hemû nirxan e. Çand, stran, wêje hwd. Heke fikr û ramanên mirov ne bi zimanê mirov bin, mirov bi zimanê xwe stranan, helbestan hîs neke wêje çênabe. Mirov bi wêjeyê dikare zimanekî xweşik û exlaqî biafirîne. Gotinên xweş lê ruhê kurdewar. Êş û xweşiyên civaka xwe bikare pê bihûne. Wêje ew e ku mirov bikare civaka xwe bi êşên xwe bindestiya xwe bihesîne. Bi dilê kurdewar bi pirsgirêkên xwe yên civakî xwedî derkeve.” Gulseren Yildirim bal kişand ser polîtîkayên pişaftinê yên li Kurdistanê tên meşandin û bandora wê.
‘Tu helbest qasî helbesteke Kurdî bandor nake’
Helbestvan Sabrî Vûral jî derbarê helbest û çîrokê û bandora wan a li ser civakê de axivî. Sabrî Vûral ji helbestvanên cîhanê jî mînak rêz kirin û destnîşan kir ku tu helbest qasî helbesteke Kurdî bandor li wî nekiriye. Sabrî Vûral piştî axaftinê helbestek jî xwend.
Bername bi pirs û bersivan û klamên dengbêj Fesîh Akgul bi dawî bû.
