Bi pêşengiya MEBYA-DERê bi girseyî serdana şîna gerîlayê PKKê Celal Amed hate kirin.
Bi pêşengiya Komeleya Piştevanî û Alîkariyê ya Malbatên di Dergûşa Şaristaniyê de Xizmên Xwe Winda Kirine (MEBYA-DER) li mala şînê ya Şemrexê ya li navçeya Rezanê ya Amedê serdana şîna gerîlayê PKKê Celal Amed (Celal Baymiş) ku di 10ê Çileya 2026an de li Hesekê ji ber kirîza dil jiyana xwe ji dest dabû hate kirin. Di serdanê de rêveberên MEBYA-DERê, rêveberên partiyên siyasî, Dayikên Aştiyê, aktîvîstên TJAyê û nûnerên rêxistinên sivîl amade bûn.
Girseyê li ber mala şînê dirûşmeya “Şehîd namirin” berz kir û paşê derbasî hundir bû. Ji bo cangoriyên azadiyê deqeyek rêz hate girtin û fatîhe û dia hatin xwendin.
Hevserokê MEBYA-DERê Ramazan Dengîz di şînê de axivî û got: “Hevalê Celal ji 77an heta îro deqe bi deqe têkoşiya. Hatina me ya îro cem hev, bi saya serê şehîdan e. Divê her tim em bibin şopdarê rêya şehîdên xwe.”
‘Em ê layiqî têkoşîna wî û hevalên wî bin’
Xwişka Celal Amed, Bîrgul Baymiş Bahçelî jî got: “Birayê min Celal ji bo me ne tenê bira bû. Di heman demê de rêhevalekî me bû. Em şanaz in ku hevalek û birayekî me yê wisa heye. Rêya wî rêya me ye, têkoşîna wî têkoşîna me ye. Em ê heta dawiyê hewl bidin layiqî têkoşîna wî û hevalên wî bin.”
