Li Îzmîrê gel piştî daxuyaniyê dorpêça polîsan şikand û ber bi Kordan a Îzmîrê ve meşiya. Di meşê de gelek kes bi îşkenceyê hatin binçavkirin.
Platforma Ked û Demokrasiyê ya Îzmîrê ji ber deriyê avahiya OSYMê heta ber bi Navenda Çandê ya Turkan Saylanê xwest meşekê li dar bixe û dawiya meşê de daxuyaniyekê bide. Polîsan nehiştin girse bimeşe lewma daxuyanî dorpêça polîsan de pêk hat. Piştî daxuyaniyê girseyê dorpêç şikand û bi dirûşmeyên ‘YPG/YPJ dimeşe, erd û ezman diheje’ ‘Bijî Serok Apo’ û ‘Bijî berxwedana Rojava’ meşiya. Di dema meşê de Îshak Akman, Amîne Aysel, Denîz Ceren Agaç, Adar Akdag, Alî Ekber Guleser û Serdar Bayram îşkenceyê hatin binçavkirin.
Daxuyanî li ser navê platformê ji aliyê Sekretera Giştî ya Baroya Îzmîre Zohre Dalkiran ve hate xwendin.
Zohre Dalkiran diyar kir ku emperyalîzmê careke din senaryoyeke tije xwîn li Rojhilata Navîn xistiye dewrê û got: “Bi destê bermahiyên DAIŞ, El Qaîde û El Nusrayê, erdnîgariyeke wiha hatiye afirandin ku tê de jin, zarok û sivîl têne qetilkirin. Piştî Filîstîna ku li ber çavên me û di nava bêdengiya cîhanê de tê tunekirin, niha jî li Sûriye û Îranê bi rêya komkujî, xwîn û hovîtiyê hewl tê dayîn ku hevsengî ji nû ve bêne sêwirandin.’’
Zohre Dalkiran anî ziman ku dema mirov mînaka Filistînê ya ku li ber çavê hemû cîhanê tê tunekirin tîne bîra xwe, mirov hêviyê ji dewletên cîhanê bike ev dibe tişteke gelekî bêwate û wiha dawî li daxuyaniyê anî: “Ev tarî ancax gel xwedî li aştî, biratî û vîna jiyana azad derkeve, wê bi dawî bibe. Aştî û wekhevî, îro pêdiviya me ya herî jiyanî ye û ev jî bi destê gelan pêk tê.”
