Tevgera Jinên Azad (TJA) li navçeya Karabaglar a Îzmîrê, êrîşên li ser Rojava bi daxuyaniyekê şermezar kir û diyar kir ku wê jin tu carî dev ji parastina jiyan û pêşeroja xwe bernadin.
Tevgera Jinên Azad (TJA) li taxa Ali Fuat Erden a navçeya Karabaglar a Îzmîrê daxuyaniyek da, Di daxuyaniyê de pankarta ‘Rojava berxwedan e, azadî ye, nayê teslîm girtin’ hate vekirin. Dovîzên ‘Li cem Rojava bin’ hatin bilind kirin û dirûşmeyên “Yek e, yek e, gele Kurd yek e”, “Rojava Rojhilat e, Kurdistan yek welat e” û “Bijî Serok Apo” hatin berzkirin.
Daxuyaniyê ji hêla aktîvîsta TJAyê Emine Bozdag ve hat xwendin.
Emîne Bozdag daxuyaniyê de diyar kir ku di dîroka têkoşîna azadiya jinan ya Rojhilata Navîn de, destkeftiya herî berbiçav Şoreşa Jinan ya Rojava ye û wiha pê de çû: “Îro ev şoreş careke din di bin gefa polîtîkayên tunekirin û înkarê de ye. Êrişên HTŞ û çeteyên girêdayî wê yên li ser Rojava, ne tenê êrişên li ser erdnîgariyekê ne; ev êriş vîna jinan ya ji bo jiyana azad û wekhev, û hêviya gelan a ji bo jiyana demokratîk ji xwe re dikin hedef. Ev êriş parçeyek ji pêvajoyeke sîstematîk in ku dixwazin jiyana nû ya ku bi pêşengiya jinan hatî avakirin, ji holê rakin.”
Emîne Bozdag di dawiya daxuyaniyê de wiha bang li hemû jinan, gelan û raya giştî ya demokratîk kir: “Li dijî êrişên li ser Rojava dengê xwe bilind bikin, piştevaniyê mezin bikin. Ne bêdengî, lê têkoşîna bi rêxistinkirî dê bide jiyîn. Em bang li saziyên navneteweyî dikin ku berpirsyariya xwe bînin cih û piştgiriya çeteyan bidin sekinandin. Me weke jin, di dîrokê de tim li ber xwe da û îro jî em berxwedana jinên Rojava wekî têkoşîna xwe dibînin. Parastina şoreşa jinan, parastina jiyanê ye.Em careke din diqîrin: Jin dê bi ser bikevin, jiyan dê bi ser bikeve!”
