Serokwekîlê Koma DEM Partiyê Sezaî Temellî li Gimgimê di çalakiya li dijî êrîşên li ser Rojava de axivî û bal kişand ser peymana di navbera HSD û HTŞê û wiha got: “Ev berxwedana li dijî her cûre xerabiyê, li dijî dijminên gelê Kurd ev peyman bi xwe re anî.”
Li navçeya Gimgim ya Mûşê, êrîşên li dijî Rojava bi meş û daxuyaniyekê ku Platforma Saziyên Demokratîk a Mûşê pêşengî lê kir hat protestokirin. Girseya ku li ber avahiya Partiya Wekhevî û Demokrasiyê ya Gelan (DEM Partî) ya Gimgimê kom bû, bi dirûşmên “Rojava rûmeta me ye”, “Gelê Kurd yek e” û “Bijî berxwedana Rojava” heta Qada Koxê meşiya. Di meşê de pankarta “Rojava rûmeta me ye” hat vekirin. Serokwekîlê Koma DEM Partiyê Sezai Temelli û nûnerên partiyên siyasî û saziyên demokratîk ên bajêr tev li çalakiyê bûn.
Serokê Weqfa Cemxaneya Vartoyê Kerem Akdag piştî meşê axivî û diyar kir ku ew ê li dijî êrişên li Rojava û Sûriyeyê têkoşîna xwe bidomînin.
‘Ev peyman destpêkek e’
Dû re Sezaî Temellî peymana ku di navbera HSD û HTŞê de hatiye îmzekirin bi bîr xist û da zanîn ku ev peyman berhema vê têkoşîn û berxwedanê ya Gelê Kurd e. Sezaî Temellî destnîşan kir ku ev peyman berhema aqlê ku muzakereyê esas digire ye û got: “Me li ber xwe da û vê berxwedana li dijî her cûre xerabiyê, li dijî dijminên gelê Kurd ev peyman bi xwe re anî. Ev peyman ne dawî ye, lê destpêkek e. Li hember kesên ku li dijî statuya Kurdan e, bi vê peymanê ji bo pêşeroja Suriyeyê gaveke girîng hat avêrin.”
‘Aqlê muzakereyê yê birêz Ocalan wê azadiya Kurdan bi xwe re bîne’
Sezaî Temellî diyar kir ku gelê Kurd û Elewî hene û heta ku ew hebin, berxwedan dê berdewam bike. Sezaî Temellî anî ziman ku rejîma li ser Sûriyeyê hatiye ferzkirin soza pêşerojekê nade Sûriyeyê û ev tişt li axaftina xwe zêde kir: “Pêşeroja Sûriyeyê bi berxwedana gelê Kurd ve girêdayî ye. Di 27ê Sibatê de, me bi manîfestoya ku ji hêla Birêz Ocalan ve hatiye pêşkêşkirin, dest bi rêwîtiyek girîng kir. Me got ku ev rê rêya aştî û civaka demokratîk e. Ji bo vê yekê, em ê bi nêzîkatiya demokrasiyê zemînên danûstandinê biafirînin. Lê ji bo ku ew zemînên danûstandinê bi awayekî xurt werin damezrandin, têkoşînek xurt hewce ye. Me ev bi dest xistiye. Hîn rêyek dirêj li pêşiya me ye. Divê kes dev ji vê têkoşînê û vê rêya sêyemîn bernede. Bawer bikin, ev aqlê muzakereyê ya ku ji hêla Birêz Ocalan ve hatiye pêşkêşkirin bê guman dê azadiya gelê Kurd bîne.”
Piştre Parlamentera DEM Partiyê ya Mûşê Sumeyye Boz axivî û diyar kir ku berxwedana li Rojava û têkoşîna jiyana hevbeş a gelê Rojava wê bê guman li çar aliyê cîhanê belav bibe.
Piştî axaftinan çalakî bi dirûşman bi dawî bû.
