Riha – Platforma Parastin û Hevgirtina Bajêr a Amedê li dijî dorpêç û êrişên li ser Kobanê 25 TIRên alîkariyê ber bi Kobanê ve rê kir. TIRên alîkariyê duh li sînorê Pirsûsê û Rihayê hatin sekinandin û alîkariya di TIRan de hatiye dorpêçkirin. Hevberdevkê Platformê Mahsûm Çiya Korkmaz bang li raya giştî kir ku ji bo vebûna deriyê sînor dengê xwe bilind bike.
Platforma Parastin û Hevgirtina Bajêr a Amedê ji bo Kobanê alîkariya mirovî berhev kir û alîkariyê bi 25 TIR ango barhilgiran duh ber bi Kobanê ve rê kir. Di nav alîkariya hatiye berhevkirin de kelûpelên pêdiviyên mirovî hene, şîr û tiştên xwarin jî têde heye. Ev 25 TIRên ku duh ji Amedê derketin rê li ser sînorê rêya Riha û Pirsûsê ji aliyê leşker û polîsan ve hate sekinandin. Parlamenterên DEM Partiyê, nûnerên Platformê, Hevşeredarê Amedê Dogan Hatun û gelek kes jî li li cihê ku TIR lê hatine dorpêçkirin sekinîne û li bendê ne ku deriyê sînor vebibe. Kêliya ku me dîmenên TIRên alîkariyê digirt, leşkeran girtina dîmenan qedexe kir.
Hevberdevkê Platformê Mahsûm Çiya Korkmaz ji ajansa me re axivî û diyar kir ku vê sibehê derdora TIRan jî ji aliyê leşkeran ve hatiye dorpêçkirin.
Derdora TIRan hatiye dorpêçkirin
Mahsun Çiya Korkmaz anî ziman ku di nav 2 rojan de wan 25 TIR alîkarî amade kiriye û pêdiviyên bingehîn, weke şîrê zarokan, ava vexwarinê, xwarin û bezên zarokan hene. Mahsun Çiya Korkmaz bi lêv kir ku TIR tenê nehatine sekinandin her wiha hatine dorpêçkirin û got: “Cendermeyan got ji me re ferman hatiye ku ev TIR, bi tu awayî dê nekevin hundirê Pirsûsê. Li vir em asteng kirin û berê me dan ser rêya Kilîsê. Ji me re gotin bila li ser Kîlîse biçe Kobanê. Lê me ev yek qebûl nekir. Me got heke hûn bixwazin alîkarî bikin çima rasterast li ser Pirsûsê naşînin Kobanê û li ser herêmên din dişinin. Vê sibe jî tîmeke cendermeyan derdora TIRan bi bariyeran dorpêç kir.”
‘Ji bo vebûna deriyê sînor dengê xwe bilind bikin’
Mahsûn Çiya Korkmaz diyar kir ku ew li bendê ne deriyê sînor vebibe ev TIR biçin Kobanê û wiha got: “Em bang li rêyedarên dewletê jî dikin; di hûndirê TIRan de pêdiviyên bingehîn ên mirovî hene. Ji bo ev alîkarî bigihîje Kobanê deriyê sînor vekin. Li dijî astengkirina alîkariyê ji aliyê gel ve jî bertek hene. Heke astengî çênebûna niha ev alîkar li Kobanê bû. Li ser dîplomasiyê ji bo vebûna sînor danûstandin berdewam dike. Em jî li vir li benda vebûna deriyê sînor in. Em bang li raya giştî jî dikin; ev ne tenê meseleya Kurdan e. Ev meseleya mirovî ye. Mirov nikarin xwe bigihînin avê. Ji bo wê jî hewceye hemû kesên ji xwe re dibêjin em mafên mirovan diparêzin û raya giştî ji bo vebûna deriyê sînor dengê xwe bilind bikin.”
