Komeleya Ekolojiyê ya Wanê kongreya xwe ya yekemîn a awarte pêk anî. Di kongreyê de hevserok Perîhan Sogûkbûlak axivî û got : “Em ji bo avên xwe, zozanên xwe û dar û berên xwe li ber xwe bidin.”
Komeleya Ekolojiyê ya Wanê Kongreya xwe ya 1emîn ya Awarte li avahiya xwe ya li navçeya Rêya Armûşê ya Wanê pêk anî. Hevserokên Şaredariya Bajarê Mezin a Wanê Neslîhan Şedal û Abdullah Zeydan, endam û rêveberên MEBYA-DER, TUHAY-DERê, endamên TJA, Meclîsa Dayikên Aştiyê, KURDÎGEH, DBP û DEM Partiyê yên Wanê û navçeyan tev li kongreyê bûn. Kongreyê bi deqeyekî rêzgirtinê dest pê kir. Piştre axaftina destpêkê hat kirin.
Dû re dîwana kongreyê hat hilbijartin. Piştre rapora darayî û kar û barên hatiye kirin hat xwendin.
‘Li ser xwezaya Kurdistanê qirkirin heye’
Di kongreyê de destpêkê hevseroka DEM Partiyê ya Wanê Gulşen Kûrt axivî. Gulşen Kûrt bal kişand ser polîtîkayên dewletê yên li dijî xwezaya Kurdistanê û got: “Mixabin bi salan e dewletê li ser xwezaya Kurdistanê talan û texrîbatên mezin pêk anîne. Şerê ku bi salan li Kurdistanê tê meşandin xwezaya me talan dike. Li ser xwezaya Kurdistanê qirkirin heye. Li dijî van talanan gere em li paradîgmaya xwe ya ekolojîk xwedî derkevin. Têkoşîna me roj bi roj li dijî van polîtîkayan xurtir dibe. Ez di têkoşîna we de serkeftinê dixwazim.”
‘Ekolijî lingekî paradîgmaya me ye’
Paşê Hevşaredarê Şaredariya Bajarê Mezin a Wanê Abdullah Zeydan axivî. Zeydan da zanîn ku talana ekolojiyê polîtîkaya modernîteya kapîtalîst e û wiha axivî: “Li welatê me jî ev polîtîka li dijî paradîgmaya Rêberê Gelê Kurd Abdullah Ocalan tê meşandin. Ekolojî lingekî bingehîn yê paradîgmaya me ye, divê em hemû li gor wê nêz bibin. Îro bi heman hişmendiyê li Rojavayê Kurdistanê jî êrişî gelê Kurd dikin. Lê li her derê gelê Kurd li dijî van êrişan li paradîgmaya xwe xwedî derdikeve. Em ê yekitiya xwe jî xwîşk û biratiya gelan jî xurt bikin.”
Zeydan bal kişand ser polîtîkayên qeyiman jî û got: “Qeyim gelek projêyên ji bo bajarê Wanê betal kirin, ji ber van polîtîkayan îro ava qirêj a bajêr hemû diçe Behra Wanê. Ev qetlîameke mezin e li ser Behra Wanê.”
Hevseroka Komeleya Ekolojiyê ya Wanê Perîhan Sogûkbûlakê jî bi xêrhatina beşdaran kir û got: “Em ji bo avên xwe, zozanên xwe û dar û berên xwe li ber xwe bidin.”
Piştî axaftinan hilbijartin hat kirin. Erdogan Oduk û Perîhan Sogûkbûlak wek hevserokên Komeleya Ekolojiyê ya Wanê hatin bijartin.
