Wan – Aktivistê Komeleya Ekolojiyê ya Wanê Basrî Arslan diyar kir ku elîtîst bixwazin jî nikarin xwezayê biparêzin û wiha got: “Ekolojî berhevkirina çend gilêşan an di mala xwe de xwedîkirina ajalekî an jî di guldankekê de mezinkirina darêkê nîn e.”
Komeleya Ekolojiyê ya Wanê ser parastina ekolojiyê xebatên xwe didomîne. Komele yekemîn kongreya xwe ya awarte pêk anî û rêveberiya nû dest bi xebatên xwe kir. Aktîvîstê komeleyê Basrî Astan têkildarî plansaiyên komeleyê yên dema pêş ji ajansa me re axivî.
‘Komînên xwezaparêz dê werin avakirin’
Basrî Arslan da zanîn ku armanca wan a sereke ew e ku talana xwezayî ya li Kurdistanê tê kirin deşîfrekirin û pêşî li talanên nû girtin e. Basrî Aslan diyar kir ku Tevgera Ekolojiyê ya Mezopotamyayê dê xwe li tevahiya Kurdistanê saz bike û got: “Dê di pêşerojê de komînên xwezaparêz werin avakirin. Zanista xwezaparêziyê belav bibe dê gel bi xwe daristanên xwe, av û axa xwe biparêze. Tê ditîn ku ev saziyên jîngehparêz ji bo parastina xwezayê nabine bersiv. Ew di nava modernîteyê de pêş dikevin. Bi vê rêyê gel jî tê xapandin. Jîngehparêz xwe weke xwezaparê nîşan didin.”
‘Divê em dest ji ferasetên modernîteyê berdin’
Di berdewama axaftina xwe de Basrî Arslan bal kişand ser bingeha ekilojiyê û wiha pê de çû: “Ekolojî berhevkirina çend gilêşan an di mala xwe de xwedîkirina ajalekî an jî di guldankekê de mezin kirina darêkê nîn e. Helwesta jingehparêzên elîtîst di eslê xwe de ev tişte ye. Mînak Greenpeace ewqas reklama xwe kir lê me dît ku tiştê ku gel bi xwe di nav de nebe kesên elîtîst bi xwazin jî nikarin xwezayê bi parêzin. Ji ber vê em ê vê helwestê xwezaparêziyê di nava xwe û gel de saz bikin. Ev feraset dê pêş bikeve û ji bo tevahiya cihanê jî dê bibe mînak. Em di xwazin vê hişmendî û hişyariyê ne tenê li Kurdistanê di tevahî cihanê de belav bikin. Ji bo wê jî em dibejin divê xwecihiyên li her derekê xwedî li xwezaya xwe derbikevin. Ji bo vê jî pêwîst e em dest ji ferasetên modernîteya ku her tiştê wê li ser xapandinê hatiye avakirin berdin û feraseteke nû ava bikin.”
‘Bila her kes xwedî li xweza, av, gund, kanî û axa xwe derkeve’
Basrî Arslan di dawiya axaftina xwe de bi bîr xist ku mirov ne xwedîyê xwezayê ye lê parçeyekî xwezayê ye û pê de çû: “Xweza hebe dê mirovahî jî hebe. Dema me xweza kuşt dê mirovahî jî bimire. Ji ber vê ez bang dikim bila her kes li xweza, av, gund, kanî û axa xwe xwedî derkeve.”
