Ji bo nivîskar û zimanzanê Kurd Mehmet Emîn Bozarslan ê ku jiyana xwe ji dest da li Mala Şînê Odabaşi Bal a li Rezanê şîn hate danîn. Biraziyê Bozarslan, Mahmut Bozarslan da zanîn ku apê wî ji bo gelê Kurd mîrateyek hiştiye û got: “Seyda ferheng û alfabeya Kurdî pêş xist û em bi wê serbilindin ku ji mere mîrateyek wisa hiştiye. Ev mîrateya wî dê her tim rêya me ronî bike.
Nivîskar û zimanzanê Kurd Mehmet Emîn Bozarslan di 92 saliya xwe de 9ê Sibatê li Swêdê koça dawî kir. Bozarslan bi salan bû ji bo ziman û wêjeya Kurdî xebatên bêhempa dimeşand û ew 45 sal li sirgûniyê jiyana xwe domand.
Bozarslan ê nexweş bû duh li bajarê Uppsala ya Swêdê jiyana xwe ji dest da. Malbata Bozarslan li Mala Şînê ya Odabaşi Bal a li navçeya Rezanê ya Amedê şîn danî. Endam û rêvebirên partiyên siyasî, nûnerên saziyên sivîl û gelek kes li mala şînê serdana şînê kirin û serxweşiyê li malbatê kirin û dia û fatîhe xwendin. Şîn dê du rojan berdewam bike.
‘Mîrateya wî dê rêya me ronî bike’
Biraziyê Mehmet Emîn Bozarslan, Mahmut Bozarslan behsa jiyana apê xwe kir û da zanîn ku apê wî li du xwe mîrateyek hiştiye dê ew jî wek malbatê xwedî li vê mîrateyê derbikevin. Mahmut Bozarslan diyar kir apê wî ji bo miletê Kurd mîrate û gencîneyek hiştiye û wiha got: “Em bi çûyîna apê xwe pir êşiyan, ji ber ku me nirxekî pir giranbiha winda kir. Ne tenê ji bo me ji bo gelê Kurd jî mirovekî qedirbilind bû. Jiyana wî bi tevahî bi êş û elemê derbas bû. Xebatên ji bo ziman û wêjeya Kurdî birêve bir, ji ber xebatên xwe yên Kurdî neçar me ku jiyana xwe li sirgûniyê bidomîne. Mamoste di warê ziman û wêjeyê de bandorê li ser gelê Kurd kir. Seyda ewil ferheng û alfabeya Kurdî pêş xist û em bi wê serbilindin ku ji mere mîrateyek wiha hiştiye. Ev mîrateya wî dê her tim rêya me ronî bike.”
