Li Îzmîrê A.K. ya 16 salî ji ber dîmena hûnandina pora xwe li ser hesaba xwe parve kiribû, bi îdiaya “propagandaya rêxistinê” hat girtin û îtîraza li dijî girtina wê jî hat redkirin. Bavê wê Halît K. got ku polîsan bi darê zorê xwestin keça wî bibin, zext li wê kirine, di girtîgehê de lêgerîna tazî li keça wî ferz kirine û lê xistine.
A. K. ya 16 salî li Îzmîrê bi hinceta ku vîdeoya honandina pora xwe li ser medyaya dîjîtal parve kiriye hat binçavkirin. A.K bi îdiya “propagandaya rêxistinê” hate girtin û wê şandin Girtîgeha Zarokan a Şakranê. 39emîn Dadgeha Cezayê ya Asliyeyê ya Îzmîrê Îtiraza OHDê ya ji bo berdana A.Kyê kiriye bi hinceta “biryar li gorî kanûnan e” hate redkirin.
Bavê A.Kyê Halît K. derbarê çavdêriyên xwe yên dema bi keça xwe ya di girtîgehê de ye re hevdîtinê kiriye û tiştên ku ser keça wî hatine gotin ji Ajansa Welat (AW) re parve kir.
‘Qebûl nekirin em bi xwe bibin emniyetê’
Halît K. da zanîn ku li dora saetên nîvro du polîs hatine mala wan, pirsa keça wan ji wan kirine, dema wan sedema hatinê ji polîsan pirs kirine jî polîsan bersiva, ‘Keça we li ser hesaba xwe yê medya dîjîtal tiştek parve kiriye ji ber wê divê em wê bibin midûriyeta polîsan da ku îfadeyê bide’ û têkildarî mijarê wiha got: “Me ji wan re got hûn biçin, ev zarokeke 16 salî ye, ne pêwîst e ku hûn wê bitirsînin. Em ê bi deste xwe bînin emniyetê, piştre çi pêwîst e bikin. Lê qebûl nekirin û pirsa dibistana wê kirin da ku biçin keça min bigirin. Wê demê jî ji ber ku dibistana wê di çarçoveya pêşbirkekê de keça min şandibûn dibistaneke din, li dibistana wê ew nedîtin û kurê min çû keça min bir emniyetê û teslîmî dewletê kir. Niyeta wan ew bû ku di nav hevalên keça min de keça min bigrin û wê rencîde bikin.”
‘Emniyet dixwest bi xwe parêzerekê peywirdar bike’
Halît K. diyar kir ku emniyetê demildest ew şandin dozgeriyê û li emniyetê jî tundiyeke derûnî li ser wan dane meşandin da ku parêzereke bi dilê xwe peywirdar bikin û wiha dirêjî da axaftina xwe: “Dema parêzerê me di rê de bû gelek caran zext li ser me kirin û gotin dozgerî li benda me ya ka wê kengî parêzerê we were. Li gel ku me nedixwest parêzereke ku em nas nakin peywirdar bikin, jî serê kêliyê emniyetê carekê teklîfa parêzereke din li me kirin.”
‘Ferman çawa hatibe wisa tevgeriyan’
Halît K. destnîşan kir ku çûna keça wê ya Emniyetê, birina wê ya ber dozgeriyê û sewqkirina dozgeriyê ya ber bi dadgehê ve bi lez û bez hate pêkanîn û derbarê wê pêvajoyê de gotinên xwe wiha domand: “Çawa ferman ji jor ve hatibe wisa tevdigeriyan. Mirov digot demildest dixwazin fermanê bi cih bînin. Di nava 2 saetan de biryar dan ku keça min girtî bê darizandin. Em tevî parêzerê xwe matmayî man. Çawa dibe ku zarokeke 16 salî ji ber vîdeoyekê girtî bê darizandin. Paşê ji nişkê ve keça min birin girtîgeha Şakranê. Dewlet li gorî hiqûqa xwe jî tevbigere ev tişta ku anîn serê keça min neheqiyeke mezin e.”
Lêgerîna tazî û nava dev li keça min ferz kirin’
Halît K. diyar kir ku dema ew çûne hevdîtina bi keça xwe re, keça wî bi şermeke mezin li wan daye zanîn ku lêgerîna tazî lê hatiye ferzkirin û got: “Keça min bi temamî tazî kirine û jê xwestine ku bikuxe û her wiha heta nava devê wê jî kontrol kirine. Van tiştên ku dikin ne di çarçoveya hiqûqê ne jî di çarçoveya edaletê de mirov nikare binirxîne.”
‘Di nav faîlên edlî de tê girtin û lê dixin’
Halît K. bi bîr xist ku îro bû roja 8an ku keça wî di girtîgehê de ye û got: “Îro dîsa ez çûm hevdîtina wê û ji min re got ku wê di nav sûcdarên edlî de digirin. Keça min ji vê yeke aciz bûye û ji ber wê jî ew şandine qawişeke yekkesî û niha jî di nav zarokên edlî de tê ragirtin. Keça min ji ber tiştekê siyasî girtin nexwe çima di nav faîlen edlî de tê ragirtin? Ji ber ku di nav faîlên edlî de tê girtin niha canê wê di talokê de ye û em gelekî ditirsin tiştek bê serê wê. Ji ber ku dema em çûn hevdîtinê, min destê xwe avêt destê keça xwe û ji ber ku destê wê êşiya, destê xwe vekişand û me hinekê israr kir û dîsa bi me da zanîn ku lêdan xwariye û serê wê li dîwaran xistine û hîn jî pişt û lingên wê diêşin. Lewma kengî ez biçim hevdîtina keça xwe keça min tim digirî.”
‘Keçeke din ji ber parvekirinên xwe li cem keça min tê ragirtin’
Di dawiya axaftina xwe de Halît K. diyar kir ku keçeke din jî ji ber parvekirinên xwe yên li ser medya civakî li cem keça wî tê radigirin, wê jî lêdan xwariye û wiha pê de çû: “Eger ev tevgerên keyfî bidomin, sibê kesî ji me wê ne di ewlehiyê de be. Divê em bi vê zanînê deng bidin denge hev. Banga min li rayedarên Tirkiyeyê ew e ku heke Tirkiye welateke hiqûqê be nexwe li gorî wê tevbigerin.”
