ÎHDa Îzmîrê, bal kişand ser rewşa girtiyê nexweş ê giran Saît Toraman ku ji sedî 57 astengdar e û got: “Saît Toraman demildest berdin.”
Saît Toraman ê ji sedî 57 astengdar e di Girtîgeha Tîpa S a Bodrumê de di bin tecrîdê de tê ragirtin. Şaxa Komeleya Mafên Mirovan (ÎHD)ê ya Îzmîrê ji bo bal bikêşe ser rewşa girtiyên nexweş, li pêşiya Sumerbanka li Konakê çalakiya xwe ya rûniştinê li dar xist. Di çalakiyê de de pankarta “Girtiyên nexweş dimirin, bêdeng nemîne û nebe şirîkê mirinan” hate vekirin. Endamê ÎHDê Gulay Bîlîcî daxuyaniyê xwend.
‘Travma derbas kir, nexweşê epîlepsiyê ye’
Gulay Bîlîcî da zanîn ku Saît Toraman, di sala 2016an de dema 19 salî bû, di êrişa hovane ya DAIŞê ya di daweteke li Dîlokê de bi awayeke giran birîndar bû û wiha got: “Di wê êrişê de du birayên Saît Toraman jiyana xwe ji dest dan. Ji ber birînên giran, çoka Saît Toraman hate jêkirin û ji wê rojê ve bi protezê jiyana xwe didomîne. Di hişê wî de trawmaya giran pêş ket û nexweşiya epîlepsiyê lê peyda bû.”
‘Ji sedî 57 astengdar e’
Di berdewama axaftina xwe Gulay Bîlîcî destnîşan kir ku Saît Toraman tevî ku cezayê xwe yê eslî qedandiye jî, bi hincetên cuda nayê berdan û got: “Ji ber astengiya hişî û krîzên epîlepsiyê, Saît Toraman di girtîgehê de bi gardiyan û girtiyên din re ketiye nîqaşan. Ji ber van krîzên tenduristiyê, zêdetirî 30 dozên nû lê hatine vekirin û ev doz wek hinceta bernedana wî tên nîşandan. Saît Toraman niha di hucreyeke takekesî de tê ragirtin. Girtiyekî epîleptîk û xwedî astengiya hişî heke di hucreyê de bikeve erdê an jî krîzê derbas bike, ji ber tu kes li cem nîn e, metirsiya mirinê wî pir zêde ye.”
‘Ev sepan li dijî rûmeta mirovahiyê ne’
Gulay Bîlîcî banga pêkanîna peyamên navneteweyî û navxweyî kir û wiha got: “Li gorî xala 16emîn a Zagona Înfazê û xala 3yemîn a Peymana Mafên Mirovan a Ewropayê, ragirtina kesekî rewşa wî ya tenduristiyê giran, binpêkirina mafê jiyanê û rûmeta mirovahiyê ye.”
Di dawiya daxuyaniyê de Gulay Bîlîciyê rayedarên Tirkiyeyê hişyar kir û got: “Berpirsyarê her encameke neyînî dê meqamên dadî û îdarî bin.”
Daxuyanî bi çepikan bi dawî bû.
