Mehkemeya Îstînafî ya Îzmîrî ceza daye deyîrbaz Kasim Taşdoganî. Mehkeme 10 aşmî ceza daye deyîra “Ronahî û Bêrîvan” û “Hatin” û 10 aşmî ceza zî daye deyîra “Serhildan Jîyan e”.
Deyîrbaz Kasim Taşdogan seba deyîrê ke vatê, yeno muhakemekerdene. Kasim Tasdogan embazanê xo reyde roniştişêkî de deyîrê bi nameyê “Ronahî û Bêrîvan” û “Hatin” ê Koma Amedî vano. Nê deyîrî cayêk de zî nêameyê parekerderne. Labelê welatîyêko ke uca de beno û dima ra wexto ke erzenê keyeyê ey ser dest danê telefonê ey ser o. Telefonê ey vîdeoyê ke Kasim Taşdogan ê deyîran vano, yenê tepiştene. Sermehkemeya Komarî ya Çanakkaleyî serra 2022î de her di deyîran kena mane û bi îdîaya “propagandayê rêxistinî kerdo” Taşdoganî rê dewa akena.
Kasim Taşdogan Newroza Qersî ya serra 2023î de seba deyîra “Serhildan Jîyan e” yeno muhakemekerdene.
Mehkemeya 20. ya Cezayê Giran ya Îzmîrî dosyaya Çanakkale û dosyaya Qersî kerd yew û muhamekerdiş dewam kerd.
Padîyayîşê dosyayî ra pey ewro roniştişê qerarê dosyayî Daîreyê Cezayê Mehkemeya Îstînafî Îzmîrî ya diyîne virazîyaye. Taşdogan û avûqatê ey Zafer Încîn tewrê dewa bîyê.
Ceza deyîran rê ameye birnayene
Kasim Tasdogan û avûqatê xo Zafer Încîn roniştişê de pawitişê xo kerd û waştişê beraetî kerd. Mehkemeya 20. ya Cezaya Girane qerarê beraetî dayo zî Mehkemeya Îstînafî seba deyîra “Ronahî û Bêrîvan” û “Hatin” 10 aşmî cezaya hepsî û seba deyîra “Serhildan Jîyan e” zî 10 aşmî cezaya hepsî daye Taşdogan. Mehkemeyî waşt ke qerarê hukimî dima bêro eşkerekerdene.
Parêzerê Taşdogan dîyar kerd ke ê do seba temyîzî qerarî biresnê Mehkemeya Berze.
‘Deyîrê Kurdkî bi ceza kerdê’
Zafer Încîn ard ziwan ke na mehkema verî derheqê dosyayanê giranêran de zî qerarê xirab nêdayêne û wina vat: “Kasim ser o qerar ame dayene. Wina aseno ke cayêko berz ra qerar ame û waştêne Kasim bi ceza bikerê. Na mehkema verî dosyayê ke yê Kasimî ra giranêr ê, seba înan qerarê beraetê dayêne. La çi heyf ke Kasim bi ceza kerd. Her di deyîrî zî yê Kasim nîyê. Heta nika nê deyîran ser o qedexe çin bi. Kasim muzîsyenêko winasîno ke zaf yeno heskerdene. Şexsê Kasim de waştêne ke deyîranê Kurdkî û goşdarîyoxanê Kasim bi ceza bikerê. Mehkeme na dosya de biney nîyetê xo eşkere kerd.”
