Koordînasyona Komalên Jinên Kurdistanê (KJK) têkildarî zext û lîstokên nû yên hikûmeta Iraqê yên li dijî Şengalê daxuyanî da û got: “Em bang li her kesî dikin ku ji bo naskirin û misogerkirina statuya xweser a gelê me yê Şengalê wek dîplomatîk, siyasî û parastinê bikevin nava liv û tevgerê. Hêza berxwedanê ya gelê me çawa ku heta niha serketî bû, ji niha û pê ve jî wê serketî be.”
Piştî zextên Tirkiyeyê yên li dijî Êzidiyên Şengalê artêşa Iraqê jî ket nava tevgerê. Artêşa Iraqê duh li Şengalê dest bi çêkirina noqteyên nû yên leşkerî kir û li seranserê Şengalê jî dest bi komkirina çekên welatiyan kiriye ku Şengalî bi vê yekê bêparastin dimînin.
Koordînasyona KJK’ê têkildarî mijarê daxuyaniyek weşand.
KJKê di daxuyaniya xwe de destnîşan kir ku cîhan piştî Şerê Parvekirinê yê 1emîn îro di nav qeyrana herî mezin de ye û wiha got: “Rewşa pergala netewe dewletan ku nikare bê dewamkirin û îflasa cîhana ji du cemseran nîşaneya kûrahî û bingehîniya krîzê ye. Kaos jî ji ber şerê navbera hêzên ku dixwazin statukoya pergala hegemonîk dewam bike û jinûve dîzayn bike rû da. Ji ber ku pergala navneteweyî ya sîstema hegemonîk li Rojhilata Navîn bi netewe dewletên qirker pêk hatiye, Rojhilata Navîn û Kurdistan a ku bi çar parçeyan hatiye parçekirin bûye navenda Şerê Cîhanê yê 3yemîn. Lê belê krîza avanî û guherîna kaosî bi xwe re derfetên pêşketina li ser bingeha erênî jî tîne. Lewma Rojhilata Navîn di kêliya çarenûsê de ye: Ya wê li ser bingeha çareseriya demokratîk a Rêber Apo diyar kiriye çareseriyek esas bê ergirtin, çareseriyên bingehîn ji pirsgirêkan re bê peydakirin, ya jî wê siyaseta înkarê ya heyî dewam bike û mehkûmî her cûre hilweşînê be.”
Şengal sembola gelan baweriyan û jinan e’
Di berdewama daxuyaniya xwe de KJKê da zanîn ku dewletên mêtinger xwe dispêrin înkar û îmhakirinê û wiha pê de çû: “Hewl didin xwe bidmînin û kaosa li cîhanê jî dixwazin ji bo vê armanca xwe bi kar bînin. Komploya 15’ê Sibatê ya duyemîn ku bi êrişa qirkirinê ya li ser Rojava destpê kir, niha jî bi plana qirkirinê ya li ser Şengalê tê dewamkirin. Şengal li qirkirineke bêmînak a dîrokî rast hat ku bi destê DAIŞê hate kirin ku amûra dewletên herêmê ye. Lewma her operasyoneke leşkerî ya li ser Şengalê û her hewldana ji bo têkbirina rêveberiya xweser wê bibe êrişa duyemîn a mezin a DAIŞê. Şengal sembola jinên cîhanê, Kurdan, gelên bindest û baweriyan e. Şengal cihê qirkirin û berxwedanê ye û nêzîkatiya li Şengalê çarenûsa herêmê diyar dike. Destwerdan û êrişeke duyemîn a li ser Şengalê wê bibe qirkirineke nû ya jinê, qirkirineke nû ya Kurdan, qirkirineke nû ya baweriyan.”
Metirsiya Tirkiye û Iraqê
KJKê da bang li raya gişştî ya Iraqê û derdorên dîplomatîk kir û wiha got: “Li şûna ku li ser bingeha şerê li hemberî Kurdan bikeve xefika hêzên komploger divê bi gelê Kurd û bawermendên Êzidî re çareserî û aştiyeke stratejîk esas bê girtin û pêkanîn. Hevkariya bi pîlana Wezîrê Karên Derve yê Tirk Hakan Fîdan wê bibe desteserkirina gelên Iraqê. Yekane rêya têkbirina lîstika -tevlîhev bike û bide şerkirin- a hêzên komploger ku li ser civaka Iraqê dimeşîne, misogerkirina hebûna gelê Kurd di nava sîstema îdarî û destûra bingehîn e, naskirina statuya xweser a Şengalê ye.”
Bi ruhê yekitiya neteweyî banga seferberiyê
KJKê ji bo Şengalê wekî Rojava bi riha seferberiya yekitiya neteweyî kir û daxuyaniya xwe wiha domand: “Divê her kes di asta şoreşê de helwestê nîşan bide. Kurd û jin wê careke din qet tine neyê hesibandin, wê tine nebe, wê xwe li bêstatubûnê ranegirin. Ji bilî ‘Ya azadî, ya azadî’ wê çareseriyeke din ti carî pêk neyê. Emê nehêlin ku dagirkerî û koletiya li jinên Kurd rewa tê dîtin dubare bibe û bibe çarenûsa welatê me. Em bang li rêxistiniyên jinan û derdorên demokratîk çep hemûyan dikin; ji bo careke din li Şengalê zemîn ji qirkirinê re neyê amadekirin, piştgiriyê bidin gel û jinên Şengalê. Parastina gel û jinên Şengalê û xwerêveberî mafê rewa ye.”
‘Serkeftin bi dîplomasî siyaset û parastinê pêkan e’
Di dawiya daxuyaniyê de KJKê destnîşan kir ku naskirin û misogerkirina statuya xweser a gelê Şengalê dê li ser bingeha karên dîplomatîk, siyasî û parastinê were pêkanîn û wiha derbirî: “Hêza berxwedanê ya gelê me çawa ku heta niha serketî bû, ji niha û pê ve jî wê serketî be.”
