Sêrt – Aktivîstên TJAyê yên Sêrtê derbarê meşa ku wê di 19ê mehê de li Gemlîkê ji bo azadiya fizîkî ya Rêberê Gelê Kurd Abdûllah Ocalan pêk bê bang li jinan kirin û gotin: “Em bang li hemû jinan dikin ku li Gemlîkê em bi hev re ji bo azadiya fizîkî ya Rêberê Gelê Kurd biqîrin.”
Meclisa Jinan a Partiya Wekhevî û Demokrasiyê ya Gelan (DEM Partî) û Tevgera Jinên Azad (TJA) dê ji bo azadiya fîzîkî ya Rêberê Gelê Kurd Abdullah Ocalan bi dirûşmeya “Dem dema azadiya jinan û Rêber Apo ye” di 18ê mehê de ji herêma Botan, Serhed û ew ê ji milekî aliyê Tirkiyeyê ve jî li hev kom bibin û ew ê ber bi navçeya Gemlîkê ya Bûrsayê ve birêkevin. Jinên ku wê birêkevin dê roja 19ê mehê hemû li hev kom bibin û ew ê saet di 13:00an de dest bi meşa xwe bikin. Hevseroka DBPa Sêrtê Mûazez Bûlga û aktivîstên TJAyê Kiymet Mût û Hasret Arslan derbarê meşê de ji ajansa me re axivîn.
Hevseroka Rêxistina DBPa Sêrtê Mûazez Bûlga bi bîr xist ku sal û nîv e pêvajoyek ji aliyê Rêberê Gelê Kurd Abdulah Ocalan ve hatiye destpêkirin û wiha axivî: “Rêzdar Ocalan bang li Tevgera Azadiya Kurd kir û tevgerê jî ew banga wî bi cih anî. Piştî vê yekê êdî bar ketiye ser milê dewletê. Lê mixabin heta niha dewletê tu gaveke wisa şênber neavêtiye. Ji ber vê yekê hêviyên gelê Kurd ên ji pêvajoyê qut dibin. Her çiqas komîsyonek hatibe avakirin jî ji aliyê vê komîsyonê ve tu tiştek derneket holê. Digotin, dê piştî cejnê gav bêne avêtin lê mixabin gavên ku hatine avêtin jî tu şênberbûneke wê tune ye. Ji bo azadiya rêzdar Ocalan em dikarin meşan li dar bixin. Ji ber vê yekê jî Meclisa Jinan a DEM Partiyê û TJAyê biryarek da, dê li navçeya Gemlîkê ya Bûrsayê meşekê li dar dixe. Em ji bo tevlibûna meşê bangî hemû jinan dikin ku li Gemlîkê em bi hev re ji bo azadiya fîzîkî ya Rêberê Gelê Kurd biqîrin. Heta rêzdar Ocalan azad nebe jin û civak jî azad nabin.”
‘Azadiya ciwanan û azadiya herkesî ye’
Aktivîsta TJAyê ya Sêrtê Kiymet Mût jî bal kişand de ser gavneavêtina dewleta Tirk û ev tişt got: “Ji bo azadiya fizîkî ya Serokatî divê dewleta Tirk demildest gavên şênber biavêje û ji bo ku Serokatî azad bibe. Êdî sebra gelê Kurd jî nemaye, ji ber ku dewlet weke bi xapandin nêzîkê pêvajoyê dibe. Serok gavên herî mezin avêtiye, divê dewlet jî gav biavêje. Bangewaziya me ji herkesî heye ku xwedî li meşa Gemlîkê derbikevin. Her wiha xwedî li Serokatî û pêvajoyê jî derkevin. Azadiya Serok azadiya gelê Kurd, azadiya civakê, azadiya ciwanan û azadiya herkesî ye. Em ê her tim ji bo azadiya fîzîkî ya Serokatî li ser piyan bin. Û ji bo azadiya wî em ê li meşa Gemlîkê bin. Bi vê yekê re em bang li hemû jinan dikin ku ew roj herkes li wir amade bibe.”
‘Divê em ji bo azadiya serokatî li Gemlîkê bin’
Aktivîsta TJAyê ya Sêrtê Hasret Arslan jî ev bang kir: “Em bang li hemû hevalên jin, ciwan û dayîkan dikin ku herkes roja meşa Gemlîkê amade bibe. Em dixwazin Rêberê Gelê Kurd birêz Abdûllah Ocalan bigihe azadiya xwe ya fîzîkî. Divê em ji bo azadiya Serokatî li Gemlîkê bin.”
