AKPê piştî 23 salan cara ewil ji bo roja Newrozê bibe betlaneya giştî ji Meclisê re pêşnûme qanûn pêşkêş kir. Ev pêngav piştî daxuyaniya Serokkomar Tayyîp Erdogan hat.
Pêşniyarên ku ji sala 2000î û vir ve ji aliyê DTP, BDP, HDP, CHP û MHPê ve gelek caran ji Meclêsê re dihatin pêşkêşkirin, ji aliyê AKPê ve dihatin redkirin. Lê îsal ev pêşniyar bi tabloyek cuda xwe dide der.
Piştî Erdogan daxuyanî da û got, “Heke pêşniyarek wiha bê, ez ê erê bikim”, parlamenterê AKPê yê Stenbolê Serkan Bayram ragihand ku ji bo 21ê Adarê bibe “Cejna Newrozê” û betlaneya giştî wan ji Meclisê re pêşnûme qanûn pêşkêş kirin e.
Beriya niha di sala 2008an de MHPê, di sala 2009an de CHPê û di navbera salên 2010 û 2023yan de jî parlamenter pêşniyarên mîna vê pêşkêş kiribûn. Ev pêşniyar an neketine rojeva Meclisê an jî hatine redkirin.
Herî dawî Parlamentera DEM Partî ya Wanê Gulcan Kaçmaz Sayyîgît îsal ji bo ku roja Newroz bibe betlaneya giştî pêşnûme qanûn pêşkêşî Meclisê kiribû.
Lê balkêş e ku di nava van 23 salên serdema desthilata AKPê de hemû daxwazên ji bo Newrozê red kir û gelek caran Cejna Newrozê jî ku qedexe dikir, îsal dixwaze ji bo Newrozê gavekê biavêje.
