Hevserokê Giştî yê DEM Partiyê Tûncer Bakirhan xwest serokkomar jî tevlî pêvajoyê bibe û got: Piştî vê saetê divê meclis bikeve tevgerê û ji bo rêûresmên yasayî nexşerêyekê, planekê û bernameyekê deyne pêşiya xwe.”
Hevserokên Giştî yên Partiya Wekhevî û Demokrasiyê (DEM Partî) Tulay Hatimogulları û Tuncer Bakirhan piştî banga dîrokî ya Rêberê Gelê Kurd Abdullah Ocalan serdana partiyên siyasî didominin. Tuncer Bakirhan bi Serokê Giştî yê Partiya Saadetê Mahmût Arikan re hevdîtin kirin.
Şandeya DEM Partiyê ji aliyê Serokê Giştî yê Partiya Saadetê Mahmût Arikan û rêvberên navendî ve hatin pêşwazîkirin. Piştî pêşwazîkirinê wêne û dîmen hatin kişandin derbasî salona civînê bûn. Piştî hevdîtinê civîneke hevpar a çapemeniyê hate lidarxistin. Hevserokê DEM Partiyê Tûncer Bakirhan diyar kir ku hevdîtin erênî derbas bûye û di civînê de li gelek nuqteyan gihiştine encaman wiha got: “Me li ser metna peymana navbera Rêveberiya Demî ya Sûriyeyê û rêveberiya Bakur û Rojhilatê Sûriyeyê nîqaş kirin. Em li ser mijarên din ên li Tirkiyeyê axivîn. Metna bangawaziyê girîng bû û me di gelek civînên partiyên siyasî de îfade kir. Di metna bangê de rola Meclîsê hatiye destnîşankirin. Peywir û berpirsyariyên meclîsê hatine bibîrxistin. Em diyar dikin ku piştî vê saetê divê meclîs bikeve tevgerê û meclîs ji bo rêûresmên yasayî nexşerêyekê, planekê û bernameyekê deyne pêşiya xwe, ji ber ku partiyên siyasî yên di meclîsê de li ser mijara çareserî û aştiyê li hev dikin. Piştî bangê me hem saziyên li Tirkiyeyê û hem li cîhanê û hem jî li Tirkiyeyê ziyaret kirin û bangewazî rastî eleqeyek mezin hat. Her kesî beriya niha dabû xuyakirin ku ew girîngiyê didin vê pêvajoyê û divê ev pêvajo bi aştiyê tacîdar bibe. Di vê navberê da, pirseke pir girîng heye ku li her cihê ku em diçinê ji me tê pirsîn. Erê, gelek eleqe heye. Lihevkirineke civakî heye. Baş e, hikumet li benda çi ye? Nikarin bibin alîkar lê dipirsin bê çima heta niha gav neavêtiye û li pêşiya vê yekê çi astengî heye. Em jî bi rêya we van pirsan dubare bikin.”
Divê şert bên avakirin
Tuncer Bakirhan da zanîn ku ji bo ev pêvajo bi rehetî bimeşe, tişta destpêkê bê kirin ew e ku şert û mercên muzakereyê yên Rêberê Gelê Kurd Abdullah Ocalan bên avakirin û got: “Binêrin, banga birêz Ocalan jî rê li ber lihevkirina li Sûriyeyê vekir. Rehet bin, bangê li wê derê rêveberiya Bakur û Rojhilatê Sûriyeyê û rêveberiya Şerayê li hev civand. Rê li ber pêşketinên girîng vekir. Ew pêvajoya ku em ji nêz ve dişopînin û girîngiyê didinê jî bûye mifteya vê pêvajoyê ku em dibêjin heke rast were birêvebirin zemîneke Sûriyê ya demokratîk dikare pêk were. Ji ber vê yekê, birêz Serokkomar jî di vî warî de tiştên gelekî girîng got. Yê serkeftî wê gelê Sûriyeyê be û got em bi vê re li hev dikin û em girîngiyê didinê. Yê serketî wê ne tenê gelên li Sûriyeyê, her wiha Tirkiye be û ev pêvajo wê li Tirkiyeyê bimeşe. Rojhilata Navîn wê bi ser bikeve.
Mahmut Arikan; Muzakereya partiyên siyasi girîng e
Mahmut Arikan jî axivî û got: “Em di demên awarte de dijîn. Dema ku em li bûyerên hem li welatê me hem jî li erdnîgariya me ya nêz dinerin; me îro careke din dît ku çiqasî girîng e partiyên siyasî li hev bicivin û muzakereyan bikin. Ez pê bawer im ku bi rêya vê hevdîtin pirsnîşanên têkildarî bûyeran ji holê hate rakirin.”
