Endama Heyeta Îmraliyê Pervîn Buldan piştî civîna bi Devlet Bahçelî re diyar kir ku pêvajo derbasî qonaxa duyemîn bûye û got: “Di vê qonaxê de hewcehî bi zemîneke qanûnî û hiqûqî heye. Divê qanûna aştiyê hebe.”
Endamên Heyeta Îmraliyê ya Partiya Wekhevî û Demokrasiyê ya Gelan (DEM Partî) Pervîn Buldan, Mîthat Sancar û Faîk Ozgur Erol li Meclîsê bi Serokê Giştî yê MHPê Devlet Bahçelî re hevdîtin kir. Civîn ji çapemeniyê re girtî pêk hat.
Piştî civînê Pervîn Buldan û Bahçelî daxuyanî dan.
Buldan: Ev qonax ji bo qanûnan girîng e
Pervîn Buldan di daxuyaniyê de wiha axivî: “Têkildarî hevdîtina 2yê Kanûnê ya li Îmraliyê û geşedanên piştre de me birêz Bahçelî agahdar kir. Em li ser qonaxên pêvajoyê axivîn. Hevdîtineke girîng û biqîmet bû. Li gorî me, divê qonaxa nû ya pêvajoyê li ser zemîneke nû were domandin. Em dikarin bibêjin derbasî qonaxa duyemîn bûne. Di vê qonaxê de jî pêdivî bi zemîneke zagonî û hiqûqî heye. Pêwîstî bi zemîneke qanûnî heye. Helbet divê qanûna aştiyê hebe û dixwazin vê bi taybetî jî bibêjin. Xebatên partiyên siyasî û komîsyonê yên ji vir şûnde dê girîng bin. Me jî nêrînên xwe bi birêz Bahçelî re parve kirin. Me bendewariyên xwe yên têkildarî qanûnan jê re parve kir.”
‘Ez gotinên Pervîn xanimê îmze dikim’
Bahçelî jî got: “Pervîn xanimê her mijar bi aşkerayî anî ziman. Ez îmzeya xwe diavêjim bin her gotina wê.”
