Amed – Zarokên Mehmet Ozdemîr ku 27 sal in winda ye anîn ziman ku ew bi hesreta dîtina bavê xwe mezin bûne û xwestin cihê hestiyên bavê wan bê eşkerekirin û faîl bên darizandin.
Di salên 1990î de li gelek gund, bajarok, navçe û bajarên Bakurê Kurdistanê welatparêz, siyasetmedar û aktîvîst hatin revandin û di binçavan de hatin windakirin. Yek ji van windayan jî Mehmet Ozdemîr e. Malbata Ozdemîr ji ber şewitandina gundên xwe neçar dimînin ku koçî navenda Amedê bikin. Mehmet Ozdemîr li Amedê bi karê dan û standina sewalan re mijûl dibe. Roja 26ê Kanûna 1997an dema ew ji mala xwe derdikeve ku biçe bazara sewalan a Amedê, beriya biçe bazarê diçe cem mala nasekî xwe û paşê jî diçe qawhexaneyek nêzî bazarê. Dema ew li qahwexaneyê li gel hevalên xwe rûniştiye, kesên çekdar ên sivîl tên qahwexaneyê û wî desteser dikin û dibin. Piştre jî ew tê windakirin. Ji wê rojê ve agahî ji Mehmet Ozdemîr nayê wergirtin. Hemû serlêdan û hewldanên malbatê bê encam dimînin.
Mehmet Ozdemîr bavê 7 zarokan bûye. Dema tê windakirin lawê wî Mehmet Hebûn Ozdemîr hê nehatiye dinê. Navê bavê wî lê dikin. Malbata Ozdemîr got Hebûn ji ber hesret û kesera bavê xwe di sala 2019an de dawî li jiyana xwe tîne. Malbat dibêje piştî Hebûn xwe kuşt, êş li ser êşa wan zêde bû.
Zarok û neviyên Mehmet Ozdemîr tev li çalakiya “Bila winda bên dîtin û faîl bên darizandin” a hefteya 829emîn ya li Amedê bûn.
Keçên Mehmet Ozdemîr, Yildiz Ozdemîr Kaya û Sozdar Ozdemîr ji ajansa me re axivîn û diyar kirin ku ew dixwazin hestiyên bavê xwe bibînin û dixwazin êdî gorek bavê wan hebe.
‘Ez hestiyên bavê xwe dixwazim’
Keça Mehmet Ozdemîr, Yildiz Ozdemîr Kaya anî ziman ku bavê wê du car hatiye desteserkirin û piştre hatiye berdan û cara sêyemîn jê re gotine ‘Eger em te dîsa bigrin tu yê carekê din malbata xwe nebînî’. Yildiz Ozdemîr Kaya got: “Bavê me ji qehweyê girtin û wenda kirin. Mixabin me hîn jî hestîyên wî nedîtine. Ji xwe cara sêyemîn dema ku wî girtin îşkenceyê lê kirin û çîmê wî şikandibûn. Bavê min 40 roj di nav cîha de ma. Bavê min wenda kirin, em 9 kes bûn.”
Yildiz Ozdemîr Kaya anî ziman ku dema ku bavê hatiye windakirin diya wê ducanî bûye û wiha got: “Ez û 7 xwişk û birayên min hebûn. Dêya min me di nav xizaniyê de mezin kir. Diya min ji bo bavê min gelekî têkoşiya. Polîsan ewil gotin bavê we li cem me ye, piştre înkar kirin û gotin me ew negirtîye. Pêşî daxwaznameyên me qebûl kirin û gotin me wî girtiye lê piştre înkar kirin.”
‘Em ê tevî zarokên xwe heta dawî têbikoşin’
Yildiz Ozdemîr Kaya destnîşan kir ku ew hestiyên bavê xwe dixwazin û ev yek anîn ziman: “Her kes li hestiyên xwe digere. Em ne tenê yê bavê xwe yên kesên din ku hatine wendakirin jî dixwazin. Xwedî heqê me nehêle. Heta ku di nav laşê me de xwîna me biherike, em ê tevî zarokên xwe têkoşîna xwe bidomînin. Em ê dev ji têkoşîna xwe bernedin. Em hestiyên bavê xwe dixwazin. Rewşeke pir zehmet e ji bo me. Em dijîn, em pir baş fêm dikin.”
‘Bavê meriv çiyayê pişta meriv e’
Sozdar Ozdemîr dibêje dema bavê wê hatiye windakirin, temenê wê salek û nîv bûye. Ji ber wê bavê xwe nedîtiye jî pir xembar û hestewar e. Xembarî xwe ji deng û çavê xwe dide der. Sozdar Ozdemîr anî ziman ku windakirina bavê wê ji bo wan gelek zor e û got: “Bavê meriv çiyayê pişt mirov e. Çiyayê me ji me girtin. Bê bav bûn pir zor e. Min jî dixwest bavê min hebûya û destê xwe bi serê min bixista û rê nîşanî min bida. Min dixwest şaşîtî û rastiyê nîşanî min bida. Dema hevalê min behsa bavê xwe dikin hem bi kelecan dibim hem jî xembar dibim. Çimkî min bavê xwe nedît. Meraq dikim ku hezkirina bav çawa ye.”
Şeş salî fam kiriye ku bavê wê nîn e
Sozdar Ozdemîr diyar kir ku dema ew şeş salî bûye hê nû fam kiriye ku bavê wê nîn e û wiha got: “Min didît ku bavê hevalên min hene, lê bavê min tune ye. Min her tim ji diya xwe re digot ka bavê min, diya min digot, ‘bavê we dewletê wî winda kiriye’. Birayê min Hebûn jî piştî bavê min hat windakirin, hat dinê. Birayê min her tim digot, ez yekî bê xêr bûme ku hatime dinê. Ew ew bi hesret û dîtina bavê min di 21 saliya xwe de dawî li jiyana xwe anî. Derûniya wî xera bûbû. Her tim digot bavê min tune ye, jiyana min hebe ji bo çi ye. Ew diyariya dawî ya bavê min bû, lê ew diyarî jî ji nav me bar kir.”
‘Ez ê li pey dawa bavê xwe bim’
Sozdar Ozdemîr destnîşan kir ku ew nikare hestên ku bavê wê tune bîne ziman û di dawiyê de wiha got: “Divê meriv bijî piştre bi wê hestê dihese. Gelek zor e. Lê dîsa jî xwedê sebrekî dide meriv. Heta dilopek xwîna min hebe ez ê li pey dawa bavê xwe bim. Ez ê dest ji dawa heval û dostên bavê xwe bernedim. Heke temenê min têr neke jî wê neviyên bavê min dest ji vê dozê bernedin û dawa wî dewam bikin.”
