Hevseroka DEM Partiyê ya Mêrdînê Nulîfer Elîk Yilmaz, ji meşa ku li ser sînorê Nisêbînê pêk bê, bang li hemû gelê Mêrdînê û Nisêbînê kir û got: “Em bi hevre ji bo parastina nirxên Rojava deng û berxwedana xwe bilind bikin.”
Hevseroka DEM Partiyê ya Mêrdînê Nulîfer Elîk Yilmaz, ji bo meş û çalakiya ku bi armanca piştgiriya Rojava di 20ê çile de li Nisêbînê pêk bînin bang kir. Nulîfer Elîk Yilmaz anî ziman ku li ser gelê Rojava komkujî pêk tê û wiha got: “Gelê me yê hêja, li ser gelê me yê li Rojava komkujî têne kirin. Bi destê çeteyên HTŞê û hikûmeta Sûriyeyê li ser gel komkujî tê kirin û destkeftiyên gel tê tunekirin. Jin zarok têne kuştin.”
Nulifêr Elîk Yilmaz bang li gel kir û wiha berdewam kir: “Em bang li gelê xwe dikin. Sibê (20 çile) saet di 13.00an de li ser rêya Mîdyatê ya Mêrdînê em ê kom bibin û bimeşin sînor. Em ê bi tevlêbûna Hevserokên Giştî yên DEM Partiyê û DBPê heta deriyê sînor ê Nisêbînê bimeşin. Dê li ser sînor civîna komê bê lidarxistin. Em bang li hemû gelê xwe yê Mêrdînê û Nisêbînê dikin ku em li gelê Rojava û Rojava xwedî derkevin.”
Nulîfer Elîk Yilmaz herî dawî xwest her kes li dijî êrîşên li ser rojava û polîtîkayên şer bi hevre deng û berxwedana xwe bilind bikin û got: “Em hemû gelê xwe dawetî sînorê nisêbînê dikin.”
