Dengbêj Eliyê Qerejdaxî ku ev nêzî mehekê bû krîza dil derbas kiribû û li Nexweşxaneya Zanîngeha Dîcleyê dihat dermankirin, jiyana xwe ji dest da.
Dengbêj Eliyê Qerejdaxî di 26ê Mijdarê de dema diçû mala xwe ya li Taxa Firatê ya semta Gazîlera navçeya Peyasê ya Amedê krîza dil derbas kir. Li ser vê yekê ji bo dermankirinê Eliyê Qerejdaxî rakiribûn beşa lênêrîna awarte ya Nexweşxaneya Zanîngeha Dîcleyê ya Amedê.
Li nexweşxaneyê di 2yê Kanûnê de hatibû anjiyokirin û rewşa wî ya xedar didomiya.
Hat zanîn ku Eliyê Qerejdaxî yê li Nexweşxaneya Zanîngeha Dîcleyê dihat dermankirin, îro li saetên nîvro jiyana xwe dest da.
Cenazeyê Eliyê Qerejdaxî li Goristana Yenîkoyê ya Amedê hate veşartin.
Dengbêj Eliyê Qerejdaxî kî ye?
Eliyê Qerejdaxî dengbêjek û bilûrvanek ku jo heft saliya wî ve her du çavên wî nedidîtin. Ew di sala 1963yan de li Gundê Sadiyê yê Amedê ji dayik bûye. Dibistan nexwendiye. Zewicî bûye û du zarêkên wî hene. Li Mala Dengbêjan a Amedê dengbêjiyê dikir û li bilûrê dixist.
