Şirnex – Hecî Ûsiv Gok 20 sal in li Sûka Tarî ya navçeya Cizîrê dikandariyê dike û berhemên xwezayî ku ji gundan berhev dike jê sabûn û nêrebendê çêdike. Hecî Ûsiv Gok debara mala xwe bi van berheman dike.
Li navçeya Cizîrê ya Şirnexê yek ji cihê dîrokî Sûka Tarî yê. Li Sûka Tarî gelek dikan hene û welatiyên Cizîrê jî debara xwe bi van dikanan dikin. Ji cil û bergan bigire heta pêdiviyên xwarinê li Sûka Tarî peyda dibin. Berhemên xwezayî yên li gundan jî li vê Sûkê tên firotin. Yek ji dikandarên sûkê Hecî Ûsiv Gok e. Hecî Ûsiv Gok li gel temenê xwe yê 65 salî jî 20 sal in li sûkê dikandariyê dike. Dikana wî biçûk e û di dikana wî de berhemên xwezayî yên li gundan hatine berhevkirin hene. Hecî Ûsiv Gok bi giyayê kerengan ku ji navçeya Elkê berhev dike, nêrebendê çêdike û ji kezwanan jî sabûna xwezayî çêdike.
Dikana Hecî Ûsiv Gok ji dûr ve jî bala mirovan dikişîne ser xwe. Berhemên li dikana wî tên firotin piranî ji giya û berhemên gundan pêk tên. Hecî Ûsiv Gok qala çêkirina sabûnê û nêrebendê kir.
Dermanê hestiyan: Nêrebend
Nêrebend ji giyayê kerengê tê çêkirin û yek jî taybetmendiya herêma Botanê ye. Li Botanê nêrebend bi nav û deng e û ji aliyê her kesî ve tê zanîn. Nêrebend weke dermanê hestiyan jî tê zanîn.
Hecî Ûsiv Gok diyar kir ku nêrebend bi giyayê kerengan tê çêkirin û li Şirnexê tenê li navçeya Elkê ew giya peyda dibe. Hecî Ûsiv Gok da zanîn ku ew vî giyayî ji xelkê gundên Elkê distîne û li dikana xwe ji vî giyayî nêrbendê çêdike. Hecî Ûsiv Gok wiha qala çêkirina nêrebendê kir: “Em giyayê kerengan dihêrin û piştre jî dikelînin. Piştî kelandinê ew dibe wek benîşt û em li paçan dipêçin û difiroşin. Hê jî gelek kes tên li vir nêrebendê dikirin. Ji bilî Cizîrê jî heta derveyî bajêr em difiroşin. Milet hê jî tên li vir dikirin. Feydaya wê pirr e. Nêrebend dermanê nexweşiyên weke osteoartrit (kireçleme), fitiq û hestiyan e û ji ber wê jî milet tê dikire.”
Ji kezwanan sabûnê çêdike
Hecî Ûsiv Gok ji bilî nêrebendê jî ji kezwanan sabûna serşûştinê çêdike. Hecî Ûsiv Gok bi lêv kir ku wan berê jî li gundê xwe ji kezwanan sabûn çêkirin e û û niha jî ji bo firotinê ew vî karî dike. Hecî Ûsiv Gok anî ziman ku li gorî sabûnên ji fabrîqayan tên çêkirin ji bo tenduristiya mirovan sabûna ji kezwanan tê çêkirin hê baştir e û wiha qala çêkirina wê kir: “Em li gundan kezwanan kom dikin. Piştre jî bi makîneyê wan dihêrinin û piştre dermanê wan derdixînin û dikin sabûn. Ev bi temamî xwezayî ye. Ji bo tenduristiya mirovan jî weke derman e.”
Pitik bi axa zer tên şûştin
Li dikana Hecî Ûsiv Gok tiştek din ku bala mirovan dikişîne jî axa zer ku di nava kîsekî de bû. Hecî Ûsiv Gok diyar kir ku ew vê axê ji gundê xwe kom dike û ji bo pitikên ji nû dayik dibin weke derman e. Hecî Ûsiv Gok qala vê axê jî kir û got ku ji bo laşê pitikên nû ji dayik dibin neşewetin, li cihekî germ laşên pitikan bi vê axê tê şûştin. Hecî Ûsiv Gok li dikana xwe berhemên xwezayî yên weke dims û simaqê jî difiroşe û dikana wî ji aliyê berhemên xwezayî ve gelekî dewlemend e û mîna dikana Hekîm Luqman e. Hecî Ûsiv Gok destnîşan kir ku tevî temenê xwe yê mezin jî ew ji bo debara malbata xwe neçar e bixebite û ew îdareya xwe bi vê dikanê dike.
