Tevgera Sosyalîst a Demokrasiyê (SHD) bi sernavê “Em li ser aştiyê diaxivin” panelek li dar xist. Endamê Şandeya Îmraliyê Faîk Ozgur Erol di panelê de diyar kir ku aştî meseleya Tirkan bi xwe ye jî û got: “Dema ev pirsgirêk çareser bibe, wê hêza siyasî ya Kurdan a dînamîk û çalak bibe bingeha çareseriya pirsgirêkên din ên welêt jî.”
Tevgera Demokrasiya Sosyalîst (SDH), li Navenda Çandê ya Selahattîn Akçiçek a Konakê paneleke bi navê “Em li ser Aştiyê Diaxivin” li dar xist. Berdevkê SDHê Mûsa Pîroglu, Parlamentera DEM Partiyê ya Îzmîrê Burcugul Çubuk û Endamê Şandeya Îmraliyê Faîk Ozgur Erol wekî axivêr beşdarî panelê bûn. Gelek kes jî di panelê de amade bûn û guhdarî û temaşeyî panelê kir.
Parlamentera DEM Partiyê Burcugul Çubuk destnîşan kir ku nîqaşên aştiyê îro tê wateya rizgarbûna ji zincîrên li ser Kurdistanê yên ku êdî bêhnê li her kesî diçikînin û got: “Dema em qala Kurdistanê dikin, mesele vediguhere axaftina li ser aştiyê. Em qala erdnîgariyekê dikin ku gava yekem a hemû şeran lê hatiye avêtin. Wekî sosyalîstên neteweya serdest, berpirsiyariyek dikeve ser milê me. Sosyalîst niha bi awayeke yekgirtî tevnagerin lê mînakên baş jî hene; mîna Doza Kumpasê ya Kobanê û şerê li Rojava ku sosyalîstên Tirkiyeyê û Kurdistanê bi hev re têkoşiyan.” Burcugul Çubuk her wiha anî ziman ku divê aştî bi têkoşîna çînî û kedê re bibe yek û got: “Li kolanan mirov ji ber xema nan û debarê nikarin qala şer bikin. Heta em girêdana navbera şer û xizaniyê ji karkeran re nebêjin, têkoşîna me wê kêm bîmine.”
‘Pêvajo bi înîsiyatîfa birêz Ocalan pêş ket’
Endamê Şandeya Îmraliyê Faik Ozgur Erol jî bal kişand ser tecrîda li Îmraliyê û rola Abdullah Ocalan û diyar kir ku bêbaweriya mirovan tiştekî asayî ye û wiha pê de çû: “Faktora herî diyarker ji bo me birêz Abdullah Ocalan e. Me her tim got ku tecrîda li ser Ocalan, tecrîda li ser çareseriya aştiyane ya pirsgrêka Kurd e. Ev pêvajoya ku bi hevdîtinên beriya 17 mehî dest pê kir, bi înîsiyatîfa birêz Ocalan a yekalî pêş ket. Wî piştî 50 salên pêvajoya çekdarî, zemîna siyaset û hiqûqa demokratîk nîşan da.”
‘Aştî pirsgirêka tirkan e jî’
Faîk Ozgur Erol anî ziman ku divê Kurd bi nasname û vîna xwe di nav hiqûqa komarê de cih bigirin û got: “Rastiya Kurd a ku hebûna wê nehatibû qebûlkirin, êdî dem dema wê ye ku di rêveberiya dewletê û siyasetê de bibe xwedî biryar. Rêbazên bêhiqûqî yên ku li Kurdistanê hatin ceribandin, niha li seranserê Tirkiyeyê belav bûne. Ji ber vê yekê, tevlêbûna Kurdan a li ser bingeha hiqûqê, wê dawî li vê rêveberiya derveyî hiqûqê bîne. Ev yek ji bo Tirkan jî avantajek e.”
‘Em ne bînerin, divê em têkoşînê bilind bikin’
Berdevkê SDHê Mûsa Pîroglu jî bal kişand ser rizîbûna civakî û bandora şer a li ser aboriyê û wiha got: “Şer ne tenê mirovan, aboriyê jî dihelîne. Heta ku şer ji Sêwasê wê de hebe û li vir jiyan asayî bê hesibandin tiştek dê safî nebe. Divê em qebûl bikin ku her kes di bin zextê de ye. Rizgariya ji vê desthilatdariyê tenê bi bilindkirina dengê aştiyê û demokrasiyê pêkan e.”
Mûsa Pîroglu herî dawî rexne li helwesta “temaşevaniyê” girt û ev yek anî ziman: “Dewlet bi xwe amûra tundiyê ye. Tiştê ku dewletan neçarî aştiyê dike, bilindkirina daxwaza aştiyê ya ji aliyê gel ve ye. Divê em ji helwesta temaşevaniyê derkevin û têkoşîna li qadan mezin bikin.”
Panel bi beşa pirs û bersivan bi dawî bû.
