Festîvala Kurtefîlmên Kurdî di roja 3yan de bidawî bû. Xelat pêşkeşî baştirîn fîlm û leyîstikvanan hatin kirin û leyîstikvana Kurd Rêza Mihemed ji bo kurtefîlma xwe ya “Terzî’ xelata baştirîn leyîstikvana jin wergirt.
Yekem Festîvala Kurtefîlmên Kurdî li City Cinema ya Silêmaniyê îro di roja 3yan de bi dawî bû û xelat pêşkeşî baştirîn leyîstikvan û fîlman hatin kirin.
Di festîvalê de 29 kurtefîlmên ji çar beşên Kurdistanê bi zaravayên cuda yên Kurdî hatin nîşandan. Festîvalê sê rojan dom kir. Di her sê rojên festîvalê de, fîlm rojane dihatin nîşandan û jûrî jî dihatin hilbijartin.
Îro, di roja dawî ya festîvalê de, 12 xelat pêşkeşî baştirîn fîlman hatin kirin. Lîstikvana Kurd Rêza Mihemed ji bo kurtefîlma xwe “Bargdûr” (terzî) xelata baştirîn leyîstikvana jin wergirt.
Berdevkê Festîvala Kurtefîlmên Kurdî Kawan Ezîz têkildarî festîvalê ji Rojnewsê re axivî û wiha got; “Festîvala me piştî sê rojan bi serkeftî bidawî bû û taybetmendiyên ku divabû di fîlmên beşdar di festîvalê de hebûna, Kurdbûna naverok û pêkhateyên wan bû.
Di vê festîvalê de derhênerên jin û ciwan yên navdar hebûn û nêzîkî 200 fîlmên me hatin pêşkêşkirin. Lê 29 fîlm hatin berbijêrkirin. Xelata herî baş ya festîvalê jinek bû ku yekem car ku di fîlmekê de dileyize. Armanca me ewe ku em festîvala xwe di salên pêş de jî bidomînin.”
Wergira Xelata Baştirîn Leyîstikvana Jin, Rêza Mihemed jî wiha got; “Min di fîlma ‘Terzî’ rol girt û xelata Baştirîn Leyîstikvan wergirt. Ev festîval ji bo hemû beşên civakê, bi taybetî ji bo jinan, girîngin. Wergirtina vê xelatê dê ji bo min teşwîqek baş be ku ez kariyera xwe ya hunerî bidomînim.”
