Hevserokê DBPê yê Rezanê Şahîn Seyyar, Hevserokê DEM Partîyê yê Rezanê Îhsan Înatçî, Hevserokê DEM Partîyê yê Surê Huseyîn Karataş û Hevserokê DEM Partîyê yê Bajarê Nû Vedat Guleç têkildarî pêvajoya Aştî û Civaka Demokratîk rewşa Rêberê Gelê Kurd Abdullah Ocalan axivîn. Hevserokan destnîşan kirin ku hem ji ber baweriya gel pê tê hem jî ji bo çareseriya pirsgirêkan karibe rola xwe pêk bîne divê mafê hêviyê yê Abdullah Ocalan were pêkanîn û azad be.
Rêberê Gelê Kurd Abdullah Ocalan di 27ê Sibata 2025an de banga “Aştî û Civaka Demokratîk” li raya giştî ya Tirkiyeyê û bakûrê Kurdistanê kir. Piştî vê bangê Rêberê Gelê Kurd û Tevgera Azadiyê ya Kurd gelek gavên şênber avêtin. Lê piştî evqas gavên şênber ku jî ji aliyê dewletê ve ji bilî avakirina Komîsyona Meclisê gaveke şênber nehatiye avêtin. Rayedarên dewletê diyar kiribûn ku dê piştî Cejna Remezanê hin gavên qanûnî bên avêtin û Serokê MHPê yê Giştî Devlet Bahçelî jî hişyar kiribû ku divê demildest gav bên avêtin û hewcehî bi mijûlkirinê nîne.
Hevserokê DBPê yê Rezanê Şahîn Seyyar, Hevserokê DEM Partîyê yê Rezanê Îhsan Înatçî, Hevserokê DEM Partîyê yê Surê Huseyîn Karataş û Hevserokê DEM Partîyê yê Yenîşehîrê Vedat Guleç têkildarî pêvajoyê û rewşa Rêberê Gelê Kurd Abdullah Ocalan ji ajansa me re axivîn û destnîşan kirin ku divê mafê hêviyê were pêkanîn.
‘Gel daxwaza azadiya fîzîkî ya Rêberê xwe dike’
Şahîn Seyyar, bal kişand ser biryara Dadgeha Mafên Mirovan a Ewropayê (DMME) ya der barê “Mafê hêviyê” de û anî ziman ku tevî DMMEyê dem dabû dewleta Tirkiyeyê jî dewletê ev maf hêj jî pêk neaniye. Şahîn Seyyar bal kişand ser helwesta dewletê ya li hemberî biryarên hiqûqî yên navneteweyî û anî ziman ku heta binesaziya makezagonî neyê avakirin û azadiya fîzîkî ya Abdullah Ocalan pêk neyê dê pirsgirêkên li welat çareser nebin.
‘Gelê me ji bo aştiyê amade ye’
Şahîn Seyyar destnîşan kir ku tevî 27 salên di bin zor û zehmetiyên girtîgehê de, Abdullah Ocalan di 27ê Sibata 2025an de manîfestoya “Aştî û Civaka Demokratîk” ragihand û wiha got: “Gelê me ji bo aştiyê amade ye, lê bêbaweriyek heye. Rêberê gel ev gav avêt û gel jî di hemû qadên jiyanê de li vê manîfestoyê xwedî derket.” Şahîn Seyyar di berdewama axaftina xwe de bal kişand ser berjewendiyên hêzên hegemonîk û modernîteya kapîtalîst ku şer wekî amûrekî aborî û siyasî dibînin û wiha pê de çû: “Rêberê gelê Kurd di aştiyê de israr dike û dibêje; ‘Şer na aştî, mirin na jiyan, kuştin na bihevrejiyan.’ Lê belê hêzên şerxwaz berjewendiyên xwe di şer de dibînin, naxwazin aştî pêk were. Dixwazin bi kaos û tevlîheviyê welatan xera bikin û hegemonyaya xwe li ser ser û binê erdê bidomînin. Ji ber ku aştî zirarê dide wan, li hemberî aştiyê disekinin.”
‘Pêwîst e binesaziya vê aştiyê bi qanûnan were xurtkirin’
Şahîn Seyyar di dawiya axaftina xwe de wiha bangawaziya raya giştî û dewletê Tirkiyeyê kir: “Bangawaziya me ji raya giştî re ev e: Em bi vê pêvajoya ku Rêberê gelê Kurd daye destpêkirin bawer in. Pêwîst e em bi yekîtiyeke demokratîk pêşwaziya vê bikin. Divê em yekîtî, tifaq û hezkirina xwe xurt bikin. Bangawaziya me ji bo dewletê jî heye: Divê demildest gavên zagonî û makezagonî werin avêtin. Divê ev pêvajo bi makezagonan were destekkirin. Niha lingê vê pêvajoyê li hewa ye; divê naveroka wê were dagirtin. Weke ku Birêz Bahçelî jî gotibû, ‘Çivîka bêper nikare bifire.’ Pêwîst e binesaziya vê aştiyê bi qanûnan were xurtkirin da ku ev pêvajo bi selametî bigihe serî.”
‘Divê qanûn bên çêkirin’
Hevserokê DEM Partîyê ê navçeya Bajarê Nû Vedat Gûleç ji balkişand li ser “Mafê Hêvîyê” û got: “DMMEyê di sala 2014an de ji bo gelek girtiyan û ji bo Serok Apo biryarek da. Li gorî vê biryarê, mafê hêviyê yê Serokê Gelê Kurd Serok Apo heye. Li gorî vê biryarê divê Serok Apo ji hefsê were berdan û azad bibe.” Vedat Guleç bal kişand ser gotinên Serokê MHPê yê Giştî Devlet Bahçelî û ev tişt gotin: “Serokê MHPê Devlet Bahçelî jî got ku divê Serok Ocalan li gorî biryarên DMMEyê ji zindanê were berdan. Lê belê ji bo vê divê di Meclisê de qanûn û rêzname derbas bibin. Ji bo vê yekê divê hikûmet qanûn û rêziknameyekê hazir bike û bişîne Meclisê.”
‘Bi taybetî ji bo Birêz Ocalan mafê hêvîyê’
Hevserokê DEM Partiyê yê Rezanê Îhsan Înatçî jî diyar kir ku “Mafê Hêviyê” di çarçoveya mafên mirovan de ji herkesê re derbasdar e û got: “Çimkî dema mirovek heta dawiya emrê xwe di zindanê de bîmîne, hiqûqa navneteweyî vê yekê red dike. Vî mafî dide her kesî, bi taybetî jî birêz Abdullah Ocalan. Ev mafê hêviyê pir tê gotin lê ji ber ku nakeve pratîkê baweriya xelkê jî ji gotinan nayê. Gotin bê wate dimînin. Ji ber vê yekê em hêvîdar in ku demeke nêz de pêşî li mafê hêviyê bê vekirin û hiqûq li gorî wê bê çêkirin. Bikaranîna mafê hêviyê kilîta derê demokrasiyê ye, kilîta derê wekheviyê ye.”
‘Em ji Rêberê Gelê Kurd Abdullah Ocalan bi bawer in’
Hevserokê DEM Partîya Sûrê Huseyîn Karataş jî destnîşan kir ku divê “Mafê Hêviyê” were pêkanîn û got: “Gelê Surê dibêje iradeya me û her tiştê me di destê Serok de ye, dikare ser navê me bazarê bike û ew pêşiya me û Tirkiyeyê veke. Em bi wî bawer in.” Huseyîn Karataş jî bal kişand ser giringîya gotina Devlet Bavçelî û di berdewama axaftina xwe de qala pevajoya heyî kir û got: “Divê êdî gav bên avêtin. Gelê Kurd û Tirk gelên li Tirkiyeyê dijîn şer naxwazin. Em bawer in ku dê gotin hatine gotin werin bicihanîn.”
