Şirnex – Ji ber xebata tunelê ya şîrketa Bolunmez Enerjî ya ku aydî parlamenterê berê ya AKPî Suleyman Bolunmez e, gundê Avgamasiya ji demsala biharê ve bêav e. Şêniyên gund anîn ziman ku ji ber xebatên tunelê xaniyên wan jî zerar dîtinê û xwestin pirsgirêka wan a avê çareser bibe.
Gundê Avgamasiya ya giredayî Şirnexê ji ber xebatên tunelê ya şîrketa Suleyman Bolunmez ê AKPyî ji demsala biharê ve bêav e. Şîrketa Bolunmez Enerjî ya ku aydî Parlamenterê berê yê AKPê Suleyman Bolunmez e, li Şirnexê gelek kanê komiran vêkiriye. Şîrketa Bolunmez nêzî salekê ye li çiyayê Cûdî ya Şirnexê tunelê vedike. Ji ber xebatên kana komirê û tunelê xwezaya herêmê wêran dibe û zerareke mezin dide welatiyan. Şîrketa Bolunmez piştî li ber gundê Avgamasiya dest bi vekirina tunelê kir, ji ber teqandina dînamîtan gelek avahiyên şeniyên gund zerar dîtin û sondaja avê ya gundiyan jî zerar dît. Ji ber vê yekê ava gund qut bû ye. Ji ber qutbuyîna avê gundê avgamasiya nêzî salek e bêav in.
Şeniyên gund ku em bi wan re axivîn anîn ziman ku wan gelek caran daxwazname ji Waltiya Şirnexê re şandinê, lê tevî vê yekê jî pirsgirêka wan a avê nehatiyê çareserkirin. Welatiyan destnîşan kirin ku ji ber tunebûna avê gelek zor û zahmetiyan dijîn.
‘Ji demsala biharê ve bêav in’
Welatiyê Xancer Gungen diyar kir ku ji ber tunebûna avê ew gelek zahmetiyan dijîn û wiha got: “Li wir kana komirê çêkirine. Nava gund hertim toz û dûmana komirê ye. Niha jî dest bi çêkirina tunelê kirine. Piştî dest bi karê tunelê kirin, ji ber teqandina dînamîtan ava me jî qut bû. Me bîr vêdabûn. Dibîra me de av nema ye. Ji ber tunebûna avê em nikarin fekî biçînin û erdê xwe av bidin. Em ji bo dabinkirina pêdiviya xwe ya avê bi erebeyan avê ji dervê gund tînin. Em gelek zahmetiyan dijîn. Daxwaza me ew e ku pirsgirêka me ya avê çareser bibe. Yên ku pereyên wan hene ji xwe re tangêrên avê dikirin. Lê yên ku pereyên wan tune ne zorê dijîn. Ji biharê ve avê me tune ye. Em nikarin sewalên xwe jî av bidin. Me daxwazname dan. Lê encam tune. Ji ber komirê fekiyên ku em diçînin jî qirêj dibin. Bila ji vê yekê re jî çareseriyekê bibînin ku gundê me qirêj nebe.”
‘Gelek zahmetiyan dijîn’
Welatî Îsa Cavlak jî anî ziman ku ji ber teqandina dînamîtan xaniyên wan jî zerar dîtiye û got: “Piştî ku ji bo tunelê vekin li vir dînamît teqandin sondaja me jî xera bû. Ji ber wê ava me tune ye. Me gelek daxwazname dan Walitiyê. Lê me encam negirt. Ji ber tunebûna avê em gelek zahmetiyan dikşînin. Gotin em ê bi tankerên avê bidin wê. Lê nedan. Em bi derfetên xwe avê dikşînin gund. Em dixwazin vê tunelê bigirin. Ew saleke ku dest bi projeyên tunelê kirine. Piştî li vir dînamît teqandin ava bîrên me jî miçiqî. Şîrketa Bolunmez piştî li vir kana komirê vêkir niha jî tunelê li vir çêdike. Kana komirê û vekirina tunelê zerar mezin dide gundiyan. Daxwaznameyên me bê encam man.”
‘Di nava gund de dînamîtan diteqînin’
Îsa Cavlak bi lêv kir ku çêkirina tunelê ya di nava gund de xetereyan ava dike û wiha axivî: “Di nava gund de tunelê çêdikin. Dema li vir dînamîtan diteqînin xaniyên me jî zerarê dibînin. Xaniyan zerareke mezin girt. Ji me re gotin em ê avê ji we re bînin. Lê av neanîn. Daxwaza me ew e ku vê tunelê bigirin û pirsgirêka avê çareser bikin.”
