Hevseroka PJAKê Peyman Viyan destnîşan kir ku gelên Îranê bi ruhê berxwedana “Jin Jiyan Azadî” dikarin sîstemeke civakî ya alternatîf ava bikin û got: “Kurd li Îranê civaka herî bi rêxistinbûyî û baldar e. Em ê ji bo mafên xwe têbikoşin.”
Piştî ku Îsraîlê şeva 13ê Hezîranê li Îranê êrîş bir ser hedefên leşkerî û nukleerî yên li Tehran, Kirmaşan, Tebrîz, Kûm, Loristan û Hemedanê, li Rojhilata Navîn metirsiya şer mezin bû. Di encama êrîşan de fermandarên payebilind ên Îranî û zanyar hatin kuştin. Vê yekê hevsengiya navxweyî ya rejîma Îranê jî hejand. Partiya Jiyana Azad a Kurdistanê (PJAK) piştî van bûyeran daxuyaniyeke balkêş da.
PJAKê bang li gelên Îranê kir ku rêveberiya xwe û rêxistiniya xwe ya demokratîk pêk bînin. Rêxistinê diyar kir ku li hemberî şer û dîktatoriyê, alternatîfeke din heye û got: “Ya ku azadiyê bîne Îranê têkoşîna demokratîk a gelan e û şoreşa ‘Jin, Jiyan, Azadî’ ye.”
‘Rejîm neguhere wê êriş girantir bibin’
Hevseroka PJAKê Peyman Viyan ji rojnameya Yenî Ozgur Polîtîkayê re axivî û wiha got: “Bûyerên ku li Iraq, Lîbya û Sûriyeyê qewimîn li Îranê jî bi şêweyekî cuda pêk tên. Ev mijar bi rejîma Îranê ve jî girêdayî ye. Eger rejîm hîn bêhtir li ber xwe bide wê êrîş jî giran bibin. Milên Îranê yên li derve hemû hatin jêkirin û di vê astê de li milên wê yên navxweyî tê xistin. Gelek fermandar û rêveber hatin kuştin. Paradîgmaya Komara Îslamê ji xwe bi nakok e. Mejiyê ‘Farşîsîzm’ (Fars+Şîa) ji xwe nakokiya herî mezin e. Li aliyê din tîma rantxur a li nava rejîmê pêşî li hêzên aqlê selîm digire, siyasetê li gorî berjewendiyên xwe bi rêk û pêk dike. Krîza aboriyê zexteke giran li gel û dewletê dike. Li gel vê yekê ziwatiyeke mezin jî heye. Tenê li bakur û Zagrosan av heye. Li Îsfahan, Şîraz û Kirmanê tirseke mezin a pêla koçberiyê heye. Ev faktor û êrîşên dawî wê bandoreke mezin li gel bike. Lewma ev mijar bi baldarî tê meşandin. Li aliyê din mijara hêzên dijberê rejîmê bi taybetî jî hêzên Kurd divê bi rengekî cuda û taybet bê nirxandin.”
‘Kurd li Îranê civaka herî bi rêxistinbûyî ye’
Peyman Viyan destnîşan kir ku gelê Kurd li Îranê civaka herî bi rêxistinbûyî ye û bi baldar e û got: “Kurd li Îranê daxwaza mafên xwe yên bingehîn dikin. Berevajî îdîayên rejîmê ‘cihêkar’ nîn in. Niha gelê herî baldar û rêxistinbûyî yê li Îranê Kurd e. Hin hêzan hewl dan berxwedana ‘Jin, Jiyan, Azadî’ li gorî berjewendiyên xwe bi kar bînin. Lê belê em di vê pêvajoyê de gelekî bi baldarî tevgeriyan û me sekna xwe ya zelal nîşan dan. Vê yekê jî nîşan da ku Kurd çawa veguherîn hêza bingehîn a guherîna siyasî û civakî. Rêber Apo zêdeyî 20 sal berê gotibû ‘Kurd ê azad, nasnameya nû ya Rojhilata Navîn e’. Divê rejîm baş zanibe ku Kurd mafên xwe yên bingehîn dixwazin. Kurd bi paradîgmaya xwe ya azadîparêz hîn bi berfirehî difikire û daxwazên xwe yên bingehîn dikin. Şert û merc çi dibin bila bibin em ê ji bo mafên xwe têbikoşin. Kurd alîgirê rêveberiyeke hevpar in ku formulasyonê nîqaş bikin, ne alîgirê şer e. Di heman demê de parastina xwe dike, xwedî hêza siyasî û rêxistinî ye. Em ê dest ji Kurdîtiya xwe û mafên xwe bernedin. Weke ku Rêber Apo got, ‘Kurdîtî êdî heqîqeteke misogerkirî ye’. Em li ser şopa heqîqetê ne, Kurdîtiya me heqîqeta me ye.”
