Îranê bi fuzeyan êrîşî baregeha Amerîkayê ya li Qeterê kir. Îranê îdia kir ku baregeha Amerîkayê bi temamî hatiye rûxandin. Amerîkayê jî ragihand ku tu windayiyên wan çênebûye.
Îranê vê êvarê bi fuzeyan êrîşî baregeha El Udeyd a Amerîkayê ya li Qeterê kir, bi wê re li baregeha Eyn Esed Amerîkayê ya li parêzgeha Enbarê ya Iraqê pergela parastina hewayî hat aktîvkirin û hêzên Amerîkayê ketin veşartgehan li baregehê.
Li gorî Ruetersê ku agahiyên xwe dispêre nûçegihanê kanala El Arebeiye, pergala parastina hewayî ya baregeha Eyn Esed a li parêzgeha Enbarê ya li rojavayê Iraqê hat aktîvkirin, hêzên Amerîkayê yên li baregehê ketin binerdan.
Li gorî AFP’ê û Rueters’ê, hemwextî vê yekê, hat gotin ku li asîmana paytexta Qehterê Dohayê dengê teqînan hat bihîstin.
Li aliyekî din jî platforma Axios diyar kir ku Îranê 6 moşek avêtin baregehên Amerîkayê yên li Qeterê. Kanala fermî ya Îranê jî ragihand ku li dijî baregeha El Udeyd ku yek ji girîngtirîn baregehên leşkerî yên Amerîkayê li herêma Kendavê ye, dest bi “operasyonên mizgîniya vekirinê” hate kirin.
Qeterê piştî êrîşê qada hewayî ji firînê re girt. Rayedarek Wezareta Parastinê yê Amerîkayê daxuyand ku di êrîşê de tu windahiyên wan çênebûne.
Sekreteriya Konseya Ewlehiya Bilind a Îranê piştî êrîşê îdia kir ku wan baregeha Amerîkayê bi temamî rûxandine.
