Rêxistinên DBP û DEM Partî yên Şirnexê, li dijî birîna cezayê li Hevşaredarê Wanê Abdullah Zeydan destnîşan kirin ku gelê Wanê ne bi tenê ye û ew ê li dijî hewla tayînkirina qeyûm têkoşîna xwe bidomînin.
Rêxistinên Partiya Herêmên Demokratik (DBP), Partiya Wekhevî û Demokrasiyê ya Gelan (DEM Partî) ên Şirnex û navçeyên wê, li dijî birîna cezayê li Hevşeredarê Bajarê Mezin ê Wanê Abdullah Zeydan li ber avahiya DEM Partiyê ya Navçeya Cizîrê daxuyanî dan. Endam û nûnerên saziyên sivîl ên Şirnexê û gelek kes tev li daxuyaniyê bûn. Di daxuyaniyê de pankarta ku li ser, “Dest nedin vîna gelê Wanê û rêzê ji vîna gel re bigirin” dinivisî hat hilgirtin.
Metna daxuyaniyê ji aliyê Hevserokê DEM Partî yê Navçeya Cizîrê Yilmaz Sanri ve hat xwendin. Yilmaz Sanri anî ziman ku birîna cezayê li Abdullah Zeydan di heman demê de darbeya li dijî vîna gel e û wiha got: “Gelê Wanê di hilbijartinan de li dijî tayînkirina qeyûm bi hejmareke mezin deng dabû û bersiv dabû. Lê tevî vê yekê jî desthilata AKPê di polîtikaya xwe ya desteserkirina vîna gel de israr dike. Desthilata ku dadgehê weke amûr bikar tînê bi hinceta tayînkirina qeyûm bi awayekî li dijî hiqûqî ceza li hevşeredarê Wanê Abdullah Zeydan birî. Ev biryar li dijî hiqûqê ye û li dijî vîna gelê Wanê ye. Ev biryar li dijî vîna hemû gelan e. Em jî li vir bang dikin û dibêjin; gelê Wanê ne bi tenê ye. Em ê weke duh îro jî xwedî li vîna xwe derbikevin û li dijî vê hewldana tayinkirina qeyûm berxwedana xwe bidomînin. Ji bo pêkhatina edalet û demokrasiyê em ê têkoşîna xwe berdewam bikin.”
Daxuyanî bi lêdana çepik û berzkirina dirûşmeya, “Bijî berxwedana Wanê” bi dawî bû.
