Amed – Înîsiyatîfa Yekîtiya Demokratîk duh li Amedê konferansa “Kurdên Bakur Yekîtiya Xwe ya Neteweyî Nîqaş Dikin” li dar xist. Beşdarên konferansê destnîşan kirin ku meseleya yekîtiya neteweyî êdî ji daxwazekê derbas bûye, bûye pêdiviyeke jiyanî û diyar kirin ku divê her kesek bibe qasidê yekîtiyê ku demildest Kongreya Neteweyî ya Kurdistanê çêbibe.
Înîsiyatîfa Yekîtiya Demokratîk duh bi diruşmeya “Kurdên Bakur Yekîtiya Xwe ya Neteweyî Nîqaş Dikin” li Eywana Alî Emîrî ya Şaredariya Bajarê Mezin a Amedê konferansek li dar xist. Konferans bi beşdariyek xurt pêk hat. Nûnerên saziyên sivîl, partiyên siyasî, rewşenbîr û gelek delege tev li konferansê bûn. Di konferansê de peyama Rêberê Gelê Kurd Abdullah Ocalan hate xwendin û peyamên gelek girîng hatin dayîn. Beşdarên konferansê derbarê Yekîtiya Neteweyî ya Kurd de ji ajansa me re axivîn.
‘Yekîtî şertê herî pêşîn ê serkeftinê ye’
Endamê Înîsiyatîfa Yekîtiya Demokratîk Îmam Taşçier bal kişand ser qonaxa dîrokî ya Rojhilata Navîn û wiha axivî: “Bêyî hişmendiyeke hevpar parastina mafan li ser maseya dîplomasiyê ne pêkan e. Wekî ku hûn jî dizanin, meseleya yekîtîya neteweyî ji bo me Kurdan ne meseleyeke nû ye. Bi salan e, bi sedsalan e li ser vê axê em dibêjin ‘yekîtî’. Lê belê her carê bi sedemên cuda ev yekîtî pêş neketiye. Carinan destê dijmin, carinan jî kêmasîyên me yên navxweyî bûne asteng. Îro em di qonaxeke dîrokî de ne. Rojhilata Navîn di nav agirekî de ye û di nava vî agirî de gelê Kurd dixwaze statuya xwe, azadiya xwe bi dest bixe. Ji bo vê yekê jî şertê herî pêşîn yekîtî ye.”
‘Divê em ji ruhê perçebûnê rizgar bibin’
Hevserokê Komeleya Elewiyên Demokratîk (DAD) Zeynel Kete jî diyar kir ku yekîtî berî her tiştî di mêjî û dil de dest pê dike û wiha got: “Heta ku em wekî ferd, wekî rêxistin û wekî partî ji wê ruhê perçebûnê rizgar nebin, em nikarin yekîtiyeke mayinde ava bikin. Di dîroka me de gelek caran fersend ketine destê me lê ji ber ku me nekari bibin yek, ew fersend ji destê me çûn. Ji bo avakirina Kongreya Neteweyî, divê em gavên şênber biavêjin. Divê em ji nîqaşên îdeolojîk ên teng derkevin û li ser xalên neteweyî yên hevpar li hev bikin.”
‘Heke em nebin yek em ê herin yek bi yek’
Endama Meclîsa Dayîkên Aştiyê Meryeme Tûra jî destnîşan kir ku astengiyên siyasî pêşiya daxwaza gel dibin bend û wiha axivî: “Gelê me bi vîna xwe di kolanan de yekîtiya xwe ava kiriye. Gava ku em li ser meseleya yekîtiyê nîqaş dikin, em dibînin ku di nava civakê de, di nava gel de ev daxwaz pir xurt e. Gelê me ji zû de ye yekîtiya xwe di dilê xwe de ava kiriye. Lê kêmasî li ku derê ye? Kêmasî di pêşengiyê de ye, kêmasî di rêxistiniyê de ye. Heta niha gelek caran hewldan hatine kirin, lê her carê hinek astengiyên siyasî derketine pêş. Divê em vê rastiyê bibînin; ger em îro li ser vê axê azad bijîn, mifteya wê yekîtî ye. Heke em nebin yek em ê herin yek bi yek.”
‘Bila xalên neteweyî ji her tiştî bi pêştir bin’
Seydayê Xelatî (Mele Saîd Ozdemîr) jî bi lêv kir ku parastina mîrateya qehremanan tenê bi yekîtiyê dibe û wiha got: “Meseleya yekîtîya neteweyî êdî ji daxwazekê derbas bûye, bûye pêdivîyeke jiyanî. Em dibînin ku li Rojhilata Navîn her tişt ji nû ve ava dibe. Di vê avabûnê de eger Kurd nebin xwedî vînek û nebin xwedî yekîtîyek, em ê sedsaleke din jî di bin zilmê de bimînin. Dijmin ji çi ditirse? Dijmin ji yekîtîya me ditirse. Gava ku Kurd li her çar parçeyan piştgirîya hev bikin, tu hêz nikare li ber me bisekine. Lewma em dibêjin, çi dibe bila bibe, divê xalên me yên neteweyî ji her tiştî li pêştir bin.”
‘Yekîtî meseleya rûmetê ye’
Endama Platforma Yekîtiya Jinên Kurd Sûltan Yaray jî bal kişand ser rola înîsiyatîfên sivîl û jinan û wiha axivî: “Divê em rûmeta xwe biparêzin. Heta ku ev daxwaz ji kûrahiya civakê neyê û aktorên siyasî mecbûrî berpirsyariyê nebin, dibe ku yekîtî tenê di vê astê de bimîne. Armanca me ew e ku em li her bajarî, li her gundî û li her kolanê rûhê yekîtiyê belav bikin. Divê em ji xelkê re bibêjin ku yekîtî ne tenê meseleyeke sînoran e; yekîtî meseleya rûmetê ye, meseleya hebûn û tunebûnê ye. Werin em li mîrasa xwe xwedî derkevin û vê yekîtiyê bikin rastiyek.”
‘Yekîtî wê bibe bingeha serkeftina siyasî’
Sekreterê Giştî yê PENa Kurd Azad Zal jî diyar kir ku yekîtî dê bibe bingeha serkeftina siyasî û ev yek anî ziman: “Wekî encam, em dikarin bibêjin ku îro li vir daxwazeke pir zelal derket holê: Gelê Kurd yekîtiyê dixwaze. Niha dema wê ye ku em van fikran bikin pratîk. Çanda me, hunera me û zimanê me jixwe yek e; em ê vê yekîtiya çandî bikin bingeha yekîtiya siyasî. Gava ku em ji vir belav dibin, divê em her yek bibe qasidê vê yekîtiyê. Divê em ji bo Kongreya Neteweyî ya Kurdistanê her dem amade bin û zextê li hemû aliyan bikin. Divê Kongreya Neteweyî çêbibe.”
