Li Amedê di çalakiya windayan de li aqûbeta Zozan û Orhan Eren hate pirsîn û hate xwestin ku winda bên dîtin û kujer bên darizandin û cezakirin. Xizmên Windayan got ku heta winda bên dîtin ew ê heqîqetê bînin ziman.
Xizmên Windayan û Komeleya Mafên Mirovan (ÎHD) a Şaxa Amedê di hefteya di hefteya 868an de li ber Bîrdariya Mafê Jiyanê ya Parka Koşuyolu çalakiya “Bila winda bên dîtin û faîl bên darizandin” berdewam kir. Xizmên windayan, rêveberên ÎHDê, parêzvanên mafên mirovan û parlamenterê CHPê Sezgîn Tanrikulu beşdarî çalakiyê bûn û wêneyên windayan hildan. Di çalakiya vê hefteyê de li aqûbeta Zozan û Orhan Eren ên di sala 1997an de hatibûn windakirin, hate pirsîn. Di çalakiyê de parlementerê CHPê Sezgîn Tanrikulu jî cih girt.
‘Divê faîl werin cezakirin’
Sezgîn Tanrikulu di çalakiyê de axifî û bal kişand ser windayan û got: “Lê mixabin tevî ku me kujer dizanibûn jî lê me nekarî xwe bigihînin wan. Ji bo ku aştiya civakî pêk were, hewceye ku ji bo wendayan qanûnên nû werin amadekirin û arşîvên dewletê werin vekirin da ku faîl werin cezakirin.”
Serpêhatiya Zozan û Orhan
Piştre serpêhatiya windakirina Zozan û Orhan Eren ên xwişk û birayên hev ji aliyê endama Komîsyona Windayan a ÎHDa Amedê Berfîn Elçî ve hate xwendin. Berfîn Elçî got: “Hemşîre Zozan û hevjînê wê Orhan Eren karmendê dewletê bûn. Orhan Eren û hevjîna xwe di sala 1997an de ji bo zarokên xwe bîne navenda Amedê çûn Pasûrê û careke din agahî ji wan nehat girtin. Hevalekî Orhan yê kar ji dayika Zozanê re telefon vedike û dibêje erebeya Orhan li nêzî Qerekola Angolê ya Lîcê hatiye dîtin. Lê agahî ji wan nayê girtin.”
Berfîn Elçî diyar kir ku ruxmê hemû hewldanên malbatê jî aqûbeta Zozan û Orhan Eren nayê hînbûn û ev yek anîn ziman: “Ji ber ku malbatê bi rêyên yasayî yên navxweyî nekarî encamê bi dest bixe, doz bir DMMEyê. Di 21ê Sibata 2005an de, DMMEyê Tirkiye bi ‘binpêkirina mafê jiyanê’ mehkûm kir.”
Daxuyanî bi çalakiya rûniştinê bi dawî bû.
Malbat ango xizmên windayan jî têkildarî çalakiya xwe ji ajansa me re axivîn.
‘Parka Koşuyoliyê ji bo me bûye wek goristan’
Afîfe Tekdag a ku du birayên wê hatine windakirin jî hest û ramanên xwe anîn ziman û got: “Em her hefte li vê derê ne, ev parq ji bo me bûye wek goristan. Wekî ku her pêncşem diçin goristanan, em jî her şemî tên li vê derê û pirsa windayên xwe dikin.”
‘Heta winda bên dîtin em ê li vir bin’
Yek ji xizmê windayan Îhsan Aslan jî da zanîn ku ew 31 sal in tenê ne ji bo bavê xwe ji bo hemû windayan li vê dere ye û got: “ Her hefte em li vê derê ne, ev der ji bo me wek goristanekê ye. Îro jî li Parqa Koşuyoluyê vê heqîqetê tînin ziman û em li pey windayê xwe ne.”
‘Mezelek wan jî tune ye’
Murat Daniş endamê Partiya Komînîstên Kurdistanê (KKP) jî anî ziman ku heta ji destê wan bê ew ê her heftê li vê derê alikariya hevalên xwe bikin û wiha berdewam kir: “Ji bo me tiştên herî girîng yek jî ev çalakî ye. Yê ku dizanin ku mirine diçin li ser gora wan lê ev winda merzelekî wan jî tune ye, hestiyê wan jî tune ye. Heta ji destê me tê em ê li gel van malbatan bin.”
‘Em zivistan û havîn li vir in’
Rêveberê berê yê ÎHDê Abdulselam Înceoren jî bi lêv kir ku çalakiya wan çalakiyeke bi rûmet e û got: “Gelemperî di salên 90î de windakirin çêbûn. Hê jî malbat hestiyê xwe digerin. Her hefte li vê derê çalakî berdewam dikin; germ, sar, zivistan ji bo wan ne astengiye. Yên hatin windakirin pirsa wan tê kirin.”
