Xizmên Windayan û Şaxên ÎHDê yên Amed, Êlih, Colemêrg û Rihayê li aqûbeta Nezîr Tekçî, Ahmet Tekîn, Mûstafa Sûman hate pirsîn û hate xwestin ku kiryarên Mehmet Şerîf Avşar bên eşkerekirin.
Xizmên Windayan û Şaxên ÎHDê yên Amed, Êlih û Colemêrg çalakiya xwe ya “Bila winda bên dîtin kujer bên darizandin” ku her hefte li dar dixin domandin. Di çalakiyan de aqûbeta Nezîr Tekçî, Ahmet Tekîn, Mûstafa Sûman hate pirsîn û hate xwestin ku kiryarên Mehmet Şerîf Avşar bên aşkerekirin.
AMED
Malbatên Windayan û Şaxa Komeleya Mafên Mirovan (ÎHD) a Amedê li ber Bîrdariya Mafê Jiyanê ya Parka Koşûyolûyê ya navçeya Rezan a Amedê di hefteya 899emîn de çalakiya xwe ya “Bila winda bên dîtin û faîl bên darizandin” li dar xistin. Xizmên Windayan, endam û rêveberên ÎHDa Amedê, Dayikên Aştiyê, rêveberên rêxistinên sivîl û gelek kes tev li çalakiyê bûn. Di çalakiyê de wêneyê kesên hatine kuştin û windakirin hatin hilgirtin. Di çalakiya vê hefteyê de li kujerên Mehmet Şerîf Avşar hate pirsîn.
Di çalakiya de, nûnerên saziyan û parêzvanên mafên mirovan axivîn û xwestin aqûbeta windakiriyan bê aşkere kirin û kiryar bên darizandin. Dû re Endamê Komisyona Mafên Mirovan a Şaxa ÎHDa Amedê Yahya Polat di çalakiyê de çiroka Mehmet Şerîf Avşar ku di 10ê Gulana 1994an de li navçeya Yenîşehîr a Amedê hatibû windakirin û piştî du hefteyan laşê wî di avahiyek xerabe de hatibû dîtin xwend. Yahya Polat da zanîn ku Mehmet Şerîf Avşar ji aliyê çawîşê pispor Gûltekîn Sûtçû û sê cerdevanan ve bi darê zorê hatiye birin û xwest faîlên wî bên aşkerekirin.
Daxuyanî bi çalakiya runiştinê bi dawi bû.
COLEMÊRG
Komîsyona Windayan a Şaxa Komeleya Mafên Mirovan (ÎHD) a Colemêrgê û Xizmên Windayan çalakiya xwe ya bi navê “Bila winda bên dîtin kujer bên darizandin” a di hefteya 225an de ye, li Kolana Hunerê ya navçeya Geverê li dar xist. Di çalakiyê de pankarta li ser “Bila winda bên dîtin kujer bên darizandin” hat vekirin û wêneyên kesên hatine kuştin û windakirin hatin hilgirtin. Di çalakiya vê hefteyê de malbat û mafparêzan aqûbeta welatî Nezîr Tekçî (25) yê di 25ê nîsana 1995an de li gundê Yekmala Jor a girêdayî Geverê hat binçavkirin û careke din agahî jê nehat standin pirsîn.
‘Kiryar diyar e’
Metna daxuyaniyê ji hêla Berdevkê Komîsyona Windayan û endamê ÎHDê Eren Baskin ve hat xwendin. Eren Baskin çîroka Nezîr Tekçî vegot û behsa rabirdûya dosyayê kir. Eren Baskin anî ziman ku dosyaya Nezîr Tekçi, mînaka herî berçav a polîtîkaya bêcezahiştinê ye ku li Tirkiyeyê tê meşandin û got: “Faîl diyar e, bûyer diyar e, rastî li ber çavan in, lê ceza tune ye. Em ê ji bo derxistina heqîqetê û ji bo edaleta Nezir Tekçî yê ku hat qetilkirin, daxwaza xwe bidomînin û ji bo cezakirina berpirsiyaran bi darizandineke rastîn, dengê xwe bilind bikin.”
Daxuyanî bi çepikan bi dawî bû.
ÊLIH
Şaxa ÎHDa Êlihê û Malbatên Windayan di hefteya 735emîn de çalakiya xwe ya bi navê “Bila winda bên dîtin û kujer bêne darizandin” li ber Bîrdariya Mafên Mirovan a Cadeya Gulistanê li dar xist. Di çalakiyê de rêveberên ÎHDê û Xizmên Windayan amade bûn û wêneyên kesên ku di bin çavan de hatine windakirin û kuştin hildan. Di çalakiya vê hefteyê de aqûbeta Ahmet Tekîn ê ku di Gulana 1994an de piştî ku li navçeya Licê ya Amedê hate binçavkirin careke din agahî jê nehate girtin hate pirsîn. Rêveberê Şaxa ÎHDa Êlihê Huseyîn Elçî çîroka Ahmet Tekîn xwend. Çalakî bi deqîqeyekê çalakiya rûniştinê bi dawî bû.
RIHA
Şaxa ÎHDa Rihayê û Malbatên Windayan li ber AVM ya Novada Parkê hatin bahev û di hefteya 73yan a çalakiya xwe de kiryarên Mûstafa Sûman pirsîn. Di çalakiyê de kesên di bin çavan de hatine kuştin û windakirin hatin hilgirtin. Rêveberê Şaxa ÎHDa Rihayê Ahmet Dogan çîroka Mûstafa Sûman xwend. Çalakiyî bi çalakiya rûniştinê bi dawî bû.
