Li hin gundên navçeya Depê ya Xarpêtê nexweşiya tebekê li berxikan daye û berxik bi komî dimirin. Endamê Meclisa Şaredariya Depê Emîn Karadogan got ku heta niha Midûriyeta Çandiniyê û Sewalkariyê pêşî li vê nexweşiyê negirtiye.
Li gundên Bacixê, Qelecixê û Êxê û hin gundên din ên navçeya Depê ya Xarpêtê nexweşiya tebekê li berxikan peyda bûye û berxik bi komî dimirin. Di çend rojên dawî de li van gundên Depê ev nexweşîn derketiye û ji ber ku berxik bi komî dimirin, xwediyên pez xistiye nav zirarek mezin. Hat zanîn ku ev nexweşiya tebekê metirsiyek mezin bi xwe re tîne.
Xebatkarê DEM Partiyê Mehmet Zirig ku li herêma Depê dixebite, li ser hesabê xwe yê Xê wêneyê mirina komî ya berxikan parve kir. Di wêneyan de jî tê xuyakirin ku berxik bi komî mirin e.
Metirsiya berbelavbûna nexweşiyê
Mehmet Zirix di peyama xwe de anî ziman ku ew van wêneyan ji navçeya Depê ya Xarpêtê parve dike û got: “Di rojên dawî de li hin gundên cuda yên Depê mirina komî ya sewalan fikar û xetereyê zêde dike. Îhtîmalek mezin heye ku nexweşiyek şewbê ve. Heke demildest pêşî li vê nexweşînê neyê girtin, wê ev nexweşî li hemû herêmê belav bibe û xesarek mezin bide.”
‘Midûriyeta Sewalkariyê heta niha tiştek nekiriye’
Endamê Meclisa Şaredariya Depê yê DEM Partiyê Emîn Karadogan agahî da ajansa me û mirina bi komî ya berxikan piştrast kir. Emîn Karadogan da zanîn ku ev nexweşîn di rojên dawî de peyda bûye û li gundan belav bûye. Emîn Karadogan diyar kir ku yên hin welatiyan 80 berxik, yên hin welatiyan 70 berxik bi komî mirin e. Emîn Karadogan destnîşan kir ku nexweşiya tebekê heta niha li berxikan daye. Emîn Karadogan anî ziman ku heta niha Midûriyeta Çandiniyê û Sewalkariyê ne ya navçeyê û ne jî ya Xarpêtê li rewşê nepirsiye û pêşî li vê nexweşiyê negirtiye û heta niha xemsar tevgeriyane. Emîn Karadogan got ku wan vê rewşê bi parlamenterên partiya xwe re parve kirine û ji bo pêşîlêgirtina nexweşiyê li ser meseleyê bisekinin.
