Koma Dostaniya bi Kurdan re ya Parlementoya Ewropayê êrişên çeteyan ên li ser rojavayê Kurdistanê şermezar kirin û ji bo parastina sivîlan û bidawîkirina êrişan banga lezgîn li YE û civaka navneteweyî kir.
Koma Dostaniya bi Kurdan a Parlementoya Ewropayê li avahiya Parlementoya Ewropayê (PE)yê ya li Strasbourgê der barê geşedanên dawî yên li Rojava de civîneke çapemeniyê li dar xist. Civîna çapemeniyê ji aliyê ji Koordînatorên Koma Dostaniya bi Kurdan re û ji Koma Tifaqa Sosyalîst û Demokratên Pêşverû Andreas Schieder, endamê Koma Çep (GUE/NGL) Per Clausen û ji Koma Tifaqa Azad a Ewropayê/Keskan Leoluca Orlando ve hate organîzekirin.
Nûnerê DEM Partiyê yê Strasbourgê Faîk Yagizay, endamên Koma Tifaqa Sosyalîst û Demokratan a PEyê Evîn Încîr û Thijs Reute tev li civînê bûn.
Di civîna çapemeniyê de ewilî Faîk Yagizay axivî û têkildarî rewşa mirovî ya li Rojava nirxandin kir. Yagizay diyar kir ku rêveberiya nû ya ku piştî hilweşîna rejîma Esad derket, bêyî çavdêriya navneteweyî xeternaktir bûye û anî ziman ku bi taybet êrişên li ser Kurdan zêde bûne. Yagizay destnîşan kir ku Kobanê di bin êrişeke giran de ye, av û ceyran qut dibin û banga mudaxeleya lezgîn li hêzên navneteweyî û bi taybet DYAyê kir.
Yagizay wiha got: “Bi awayekî fermî ji duh ve agirbest hatiye ragihandin. Lê mixabin êrişên pir dijwar li ser Kobanê pêk tên. Kobanê di bin dorpêçê de ye. Av û ceyran tune ye. Herêmên din jî di bin êrişê de ne. Beriya 12 salan, Kobanê di bin dorpêça DAIŞê de bû. Rabûna li dijî vê hêsantir bû. Ji ber ku rêxistineke terorê bû. Wê demê her kesî piştgirî da me. Lê niha em ji aliyê dewletekê ve rastî êrişan tên. Em jê re dibêjin dewleta terorîst. Ji ber ku Colanî terorîst bû. Zîhniyeta wî qet nehat guhertin. Ji bo pêşîlêgirtina vê karesatê banga mudaxeleya lezgîn li hêzên navneteweyî dikin. Ewilî Tirkiyeyê rawestînin. Ji ber ku her tişt ji aliyê Tirkiyeyê ve tê organîzekirin. Rejîma Sûriyeyê rawestînin.”
Ji Koordînatorên Koma Dostaniya bi Kurdan Andreas Schieder jî diyar kir ku rewşa heyî pir krîtîk e û bilêv kir ku Parlamentoya Ewropayê ji bo Rojava yek ji platformên dîplomatîk ên herî girîng e. Schieder bal kişand ser pêwîstiya parastina sivîlan, pêşîgirtina li guhertinên demografîk û piştgiriya avahiya demokratîk a li Rojava û got, “Divê em gelê li herêmê ji tundiyê biparêzin. Divê em vê jî bikin nava pirsgirêka demografiyê ku li vir tê nirxandin. Em ê li dijî seneryoya çalakiyê û dagirkeriyên giran rabin.”
Ji Koma Tifaqa Azad a Ewropayê/Keskan Leoluca Orlando diyar kir ku li Bakur û Rojhilatê Sûriyeyê tevgereke zêde ya leşkerî heye û got ku hêzên girêdayî hikûmeta demkî ya Şamê û komên çekdar ên bi piştgiriya Tirkiyeyê êrişên koordînekirî li hermên Rêveberiya Xweser dimeşînin.
Orlando wiha got: “Divê Yekîtiya Ewropayê li dijî van geşedanan bêdeng nemîne.”
Endama PEyê Evîn Încîr jî wiha bang li Yekîtiya Ewropayê kir: “Yekîtiya Ewropayê divê bi rêya hemû saziyên xwe bikeve tevgerê.”
Endamê Koma Çep (GUE/NGL) Per Clausen diyar kir ku êrişên li ser Rojava dewam dikin û agibesteke rast tune ye û got ku divê Yekîtiya Ewropayê heta ku êrîş bi dawî bibin hemû alîkariyên ji bo rêveberiya HTŞê rawestîne. Clausen bang li Neteweyên Yekbûyî jî kir ku ji bo çareseriyeke aştiyane û demokratîk ji nû ve bikeve tevger.
Herî dawî endamê PEyê Thijs Reute jî bal kişand ser rola Tirkiyeyê ya li ser herêmê û destnîşan kir ku ji bo rawestandina êrîşan divê zexta dîplomatîk li Enqreyê bê kirin. Reute diyar kir ku dereng jî be pêkan e ku Yekîtiya Ewropayê berpirsyariyê bigre.
