Nûnertiya Rêveberiya Xweser a li Herêma Kurdistanê bang kir ku Kobanê di bin dorpêçeke mezin de ye û got: “Pêwîstiyên esasî yên jiyanî li Kobanê nemane. Em girêdayî peymanê ne, divê dorpêça li ser Kobanê bê rakirin.”
Ev 21 roj in Kobanê di bin dorpêçeke giran ya êrişên Hêzên Hikûmeta Demkî ya Sûriyeyê ye û bi krîzeke mirovî re rû bir û ye. Li aliyê din bêdengiya sazî û rêxistinên navneteweyî krîza mirovî kûrtir kiriye. Têkildarî vê dorpêça giran Nûnertiya Rêveberiya Xweser ya li Herêma Kurdistanê Mihemed Ala ji Rojnewsê re axivî û banga rakirina dorpêçê kir.
‘Şam berpirsê dorpêçê ye’
Nûnerê Rêveberiya Xweser ê li Herêma Kurdistanê Mihemed Ala bal kişand ser dorpêça li ser Kobanê û got: “Kobanê di bin dirpêçeke pir alî ya giran de ye. Pêwîstiyên esasî yên jiyanî yên mîna elektirîk, av û derman nemane. Yek ji xalên peymanê ewe ku ev dorpêç dawî bibe. Lê heta niha ev yek nehatiye bicihanîn. Ev jî necidîbûna Hikûmeta Sûriye nîşan dide.”
‘Enqere û Şam dixwazin Kobanê têk bibin’
Mihemed Ala destnîşan kir ku ew girêdayî peymanê ne û wiha domand: “Sedem ewe ku Hikûmeta Şera ji bo pêkanîna peymanê ne cidî ye. Di nepêkanîna peymanê de destê Tirkiye heye. Dixwazin Kobanê ya bûyî sembola berxwedanê têk bibin. Ev yek jî ji bo wan tenê xeyale.”
‘Ruhê Kobanê yê berxwedêr û zindî dê komployê têk bibe’
Herî dawî Mihemed Ala ev yek anî ziman: “Xelkê Kobanê nimûneya berxwedan û ruhê berxwedanê lê zindî ye. Gelê Kobanê wê tim li ber xwe bide. Ev êrişên li ser Rojava encama komployeke navneteweyî ye ku dixwazin netewa demokratîk tine bikin.”
