Odeya Bijîşkan a Êlihê têkildarî meşa wan a ber bi Enqereyê ve daxuyanî da û diyar kir ku ew ji bo parastina qada tenduristiyê û mafên xebatkarên tenduristiyê roja 14ê Adarê li Enqereyê dicivin.
Odeya Bijîşkan a Êlihê têkildarî Hefteya Tibê 14ê Adarê û meşa wan a ber bi Enqereyê ve bi dirûşmeya “Em ji bo aştî û demokrasî û tendirustiya civakê, gotina xwe dibêjin” li pêşiya Nexweşxaneya Perwerdehî û Lêkolînê ya Êlihê daxuyanî dan çapemeniyê. Di daxuyaniyê de gelek endam û rêveberên TTBa Êlihê, endam û rêveberên saziyên sivîl û gelek kes beşdarî çalakiyê bûn. Metna daxuyaniyê ji aliyê Serokê Odeya Bijîşkan a Êlihê Alî Îhsan Gundogdû ve hate xwendin.
Alî Îhsan Gundogdû diyar kir ku ew îsal jî bi biryardarî di çarçoveya hefteya tibê de li qadan e û têkoşîna xwe didomînin û got: “Em di çarçoveya Hefteya Tibê de bi biryardarî têkoşîna xwe didomînin. Da ku piştgiriyê bidin xebatkarên tenduristiyê. Em dixwazin di qada tenduristiyê de guhertinek demokratîk pêk bînin. Bi çavekî sermayê û bazirganiyê li nexweşan û qada tenduristiyê tê nihêrîn. Em bi her awayî li dijî vê yekê ne. Em bi Meşa Spî ber bi Enqerê ve dimeşin da ku 14ê Adarê bibe pîrozbahiyek. Wekî Odeya Bijîşkan a Êlihê, em beşdarî Meşa Spî dibin. Dê meşa me ji Amedê dest pê bike. Îro li Amedê kombûnek mezin a bijîşkan dest pê dike, dê ji Riha, Dîlok, Osmaniye û Edeneyê derbas bibe û di 14ê Adarê de jî li Enqereyê bi dawî dibe. Em li vir bang li hevkarên xwe dikin ku beşdarî vê meşa mezin bibin.”
Daxuyanî bi êdana çepikan bi dawî bû.
