Amed – Serokê MED TUHAD-FEDê Kerem Canpolat bal kişand ser peyama Rêberê PKKê Abdullah Ocalan û destnîşan kir ku peyameke dîrokî ye pêwîst e dewlet jî li gorî vê peyamê tevbigerê.
Piştî Şandeya DEM Partiyê ya Îmraliyê di 27 Sibatê de bi Rêberê PKKê Abdullah Ocalan re hevdîtin kir û peyama Abdullah Ocalan li Stenbolê bi raya giştî re parve kir. Banga Abdullah Ocalan a bi navê “Aştî û Civaka Demokratîk” li gelek bajarên Kurdistanê û Tirkiyeyê û li gelek deverên cîhanê jî gel li qadan peyam hat guhdarîkirin û temaşekirin. Têkîldarî peyama Abdullah Ocalan, hevserokê Federasyona Komaleyên Hiqûq û Piştevaniyê ya Malbatên Girtî û Hukumxwaran a Medê (MED TUHAD-FED) Kerem Canpolat Ajansa Welat re axivî.
‘Birêz Abdullah Ocalan gaveke mezin avêt’
Kerem Canpolat diyar kir ku banga Abdullah Ocalan bangeke dîrokî ye û dê tesîrê li tevahiya Rojhilata Navîn bike û wiha got: “Em vê bangawaziyê pîroz dibînin. Xitimandina Tirkiyeyê dê bi saya vê bangewaziyê di aliyê aborî, civakî û hiqûqî de bê derbaskirin. Li Rojhilata Navîn niha şer heye. Jin, zarok û kal koçber dibin. Di nava vî şerî de dê ev bangawazî bibe ronahî. Tevahî civak benda vê bangawaziyê bû. Birêz Abdullah Ocalan gaveke mezin avêt. Ji ser pevajoya 2013-2015an re salên dirêj derbas bûn. Di wan salan de ji aliyê dewletê ve tu gav nehat avêtin. Dewletê mafê kurdan di her alî de binpêkir.”
‘Pêwîste tecrîd rabe û Abdullah Ocalan azad bibe’
Kerem Canpolat bal kişand ser tecridkirina Abdullah Ocalan û wiha domand: “Birêz Abdullah Ocalan tiştê ku diket ser milê wî kir. Piştî vî wextî pêwîste ku li Kurdistanê û Tirkiyeyê hemû gel, sazî û partiyên siyasî mil bidin vî barî. Herkes ne tenê bi gotinan di aliyê pratîkê de jî nava têkoşînê de be. Niha muxatap hikûmet e, divê hikûmet jî zelal be û xwedî vîn be. Divê dewlet gav bavêje di aliyê fermî de. Mafê kurdan, çand û hebûna kurdan nasbike. Zemîneke hiqûqî avabike, di meclise de komîsyanan avabike ev komîsyon jî ji bo pêvajoyê bikeve nava tevgerê. Ji bo pêvajo pêşbikevê pêwîst e ku tecrîd rabe û Birêz Abdullah Ocalan azad bibe. Dewlet jî pêwîst e di vî alî de gavan bavêje.”
‘Divê em destê birêz Abdullah Ocalan xurt bikin’
Kerem Canpolat anî ziman ku pêwîst e şer bê rawestandin, dewlet gav biavêje û axaftina xwe wiha bi dawî kir: “Ji bo agirbesta PKKê bêkemasî pêk were pêwîst e nezîkatiya Tirkiyeyê jî li gorî wê be, hewceye ku ev şer bê rawestandin. Dewlet ji aliyekî ve bibejê aştî ji aliyê din ve jî êrişan berdewam bike ev pêvajo nameşe. Divê em destê birêz Abdullah Ocalan xurt bikin, hemû gel, hiqûknas, siyasetmendar û tevahiya civakê di nav xebat de bin. Em nebêjin ku banga birêz Abdullah Ocalan hat her tişt xilas, em bibêjin her tişt nû destpê dike. Em têkoşînê xurt nekin dewlet jî gavan navêje. Pêwîst e gel û partiyên muxalîf bi rol û misyona xwe rabin û hikûmet jî bi agirbestê niyeta xwe nîşan bide. Çiqas mafê gelê Kurd hatibe binpêrkirin jî, gelê Kurd ruxmê ewqas eşa xwe jî li pişt vê bangê ye.”
