PJAKê ragihand ku rejîma Îranê li dijî xwepêşandanên fermana komkujiyê daye û got, “Em bawer dikin ku biryardarî, îrade û fedakariya mezin a ku ciwan û jinan li dijî hikûmeta zordar nîşan dane dê berhemê bide û dê li ser axa Îranê roja azadiyê hilê.”
Partiya Jiyana Azad a Kurdistanê (PJAK) derbarê xwepêşandanên li Îranê daxuyaniyek nivîskî weşand. Di daxuyaniyê de hat destnîşankirin ku serhildana gelê Îranê ya li dijî rejîmê bi biryardarî û îrade li seranserê welêt berdewam dike û wiha hat gotin: “Gelên azadîxwaz kolanên bajarên bakur, başûr, rojhilat û rojavayê Îranê li dijî hêzên rejîmê yên zordar kirine qadên pevçûnan. Pêla xwepêşandanên gel gav bi gav berfireh dibe, rejîmê bêçare û matmayî dihêle. Rêveberên Komara Îslamî ji her kesî çêtir dizanin ku zilm û zordariya ku li ser gelên vê axê kirine, lê ew ne amade ne ku ji vê rêya wêranker gavek jî paşve bavêjin. Ji ber vê yekê gelê Îranê bi hêrs û îradeyek xurttir, serhildanên xwe yên demokratîk û şoreşgerî didomînin û rejîmê gav bi gav ber bi hilweşînê ve dibin.”
‘Xwepêşandan dê teqez bi ser bikevin’
Di daxuyaniyê de hat diyarkirin ku rejîm hîs dike ku ew li ber hilweşînê ye û rêveberên hikûmetê û Xameney biryar dane ku gelê serhildêr ê Îranê bikujin û tune bikin. Di xauyaniyê de hat gotin ku hewl didin bêyî agahdariya cîhanê komkujiyan bikin. Di daxuyaniyê de hat destnîşankirin ku hêzên rejîmê di çarçoveya bicihanîna fermanên kuştinan de înternet qut kirine û wiha domand: “Ji ber vê yekê, wan xetên înternet û telefonê qut kirine û hewl didin pêşiya agahdarkirina derve bigirin. Tevî ku hikûmetê ragihandina di navbera Îran û cîhanê de qut kiriye jî, dengê gelê Îranê yê azadîxwaz bi tu awayî nayê çewisandin. Hin nûçe û agahiyên ku ji cîhana derve re têne şandin nîşan didin ku hêzên hikûmeta zordar li gelek bajar û herêmên Îranê komkujiyan dikin, her cûre çekên sivik û giran bikar tînin da ku welatiyên xwepêşander bikujin. Çend wêneyên ku ji van komkujiyan hatine weşandin nîşan didin ku hêzên hikûmeta zordar bi tundî û hovîtî êrîşî xwepêşander û serhildêran dikin. Ev hewldana Komara Îslamî mînakek eşkere ya sûcê li dijî mirovahiyê ye û berpirsiyariya vê yekê bi tevahî di stûyê rêveberên vê hikûmetê de ye. Hêzên zordar ên rejîmê rasterast gule li ser gelên Tehran, Kerec, Îsfehan, Xorasan, Loristan û herêmên Kurdistanê yên wekî Îlam, Kirmaşan, Şebad, Gîlan-e Gharb, Kamyaran, Selmas û Xoyê reşandin û gelek sivîl kuştin. Îran niha bûye cihekî ku agir, serhildan û xwîn lê dikele. Di çarçoveya zanyarên me yên derbarê vê hikûmetê û xwezaya wê de ew e ku xuyaye wê çarçoveya van komkujiyan berfireh bike. Em van kiryarên hovane û dermirovî yên rejîma Komara Îslamî şermezar dikin û radigihînin ku ji bo piştgiriyê bidin gelê xwe yê ku li seranserê Îranê li azadiyê digere çi ji destên me bên em ê bikin. Em bang li hemû saziyên navneteweyî dikin ku li hember van komkujî û kuştinên hovane bêdeng nemînin û ji bo piştgiriya gelê Îranê demildest tevdîrên pratîkî bigirin. Em bang li hemû Îraniyên ku li derveyî welat, azadîxwaz û xwedî wijdan dikin ku di van kêliyên dîrokî yên dijwar de bibin dengê gelê Îranê li çaraliyê cîhanê û piştgiriyê bidin serhildana şoreşgerî ya gelê bindest ê Îranê. EEm bawer dikin ku biryardarî, îrade û fedakariya mezin a ku ciwan û jinan li dijî hikûmeta zordar nîşan dane dê berhemê bide û dê li ser axa Îranê roja azadiyê hilê.”
