Platforma Ked û Demokrasiyê di 14emîn salvegera Komkujiya Roboskiyê de çalakî li dar xist û got: “Di ser komkujiya Roboskiyê re 14 sal borîn. Lê hîna kes nehatiye darizandin. Roboskî nayê jibîr kirin.”
Di 28ê Kanûna 2011an de balafirên şer ên TSKê li Roboskiyê bombe barandin. Di êrîşa hewayî de jê 19 zarok 34 gundiyên Roboskiyê hatin kuştin. Platforma Ked û Demokrasiyê ya Amedê bi boneya 14emîn salvegera komkujiyê li pêş AZC plazaya ya Ofîsê daxuyanî da çapemeniyê. Nûner û rêveberên partiyên siyasî, saziyên sivîl, Dayikên Aştiyê û gelek kes amade bûn. Nûnerên saziyan di çalakiyê de pankarta “Cihê ku Dem Sekinî û Êş Girantir bû; Roboskî Em Ji Bîr Nakin Nadin Ji Bîr Kirin” vekirin. Hevseroka Şaxa 2yemîn a Egitim-Senê ya Amedê Duygu Ozbay daxuyanî xwend û komkujiya Roboskiyê şermezar kir.
‘Êşa malbatan û civakê qet nebû mijara lêpirsînan’
Duygu Ozbay anî ziman ku li Roboskî komkujî pêk hat û wiha got: “Di 28ê Kanûna 2011ê de 19 zarok bi giştî 34 welatî ji aliyê balafirên şer ên Tirkiyê ve hatin kuştin. 14 sal li ser komkujiyê derbas bûn. Lê tu kes nehate darizandin. Hemû lêpirsîn hatin betal kirin û lêpirsînên ku nû hatibûn vekirin pêş neketin. Komkujî, êşa malbatan û civakê qet nebû mijara van lêpirsînan.”
‘Roboskî nayê ji bîrkirin, em nahêlin bê ji bîrkirin’
Duygu Ozbay herî dawî destnîşan kir ku dê destûr nedin ku Roboskî bê ji bîrkirin û got: “Bêcezakirina ne tenê sûcên ku berê hatine kirin diparêze; Her wiha bi zanebûna bingehê sûcên nû diafirîne; Aşkerekirin û cezakirina sûcdaran pêşiya dubarekirina heman sûcan digire. Em dibêjin Roboskî nayê bîrkirin, em nahêlin bê bîrkirin.”
‘Çareserî Rêbazên demokratîk û aştiya civakê ye’
Piştî daxuyaniyê Parlamentera DEM Partiyê ya Amedê Halîde Turkoglu jî komkujiya Roboskî şermezar kir û got: “Heta ku dewlet bi vê qetlîamê re rû bi rû neyê, dê demokrasiya civakî û aştî pêk nayê. Daxwaza me ev ku pirsgirêkên li vî welatî bi rêbazên demokratîk û aştiyane bên çareserkirin.”
‘Em ê li hember komkujiya em ê her tim bisekinin’
Hevserokê Şaxa duyemîn a Egitim-Senê Serhat Kiliç jî anî ziman ku komkujiya Roboskiyê neyê ji bîr kirin û dê gel vê yekê ji bîr neke û got: ““Em îro di salvegera 14emîn de 34 kesên li Roboskiyê hatin kuştin bibîrtînin. Ev 14 sale ku birînên me hêj kûr e hêj zindiye, hêj diêşe. Em îro wek platforma Ked û Demokrasiyê hatin li vê derê me Roboskiyê bibîrbînin. Em Roboskiyê ji bîr nakin, em nadin ji bîrkirin. Em ê li dijî vê komkujiyê û hemû komkujiya her dem rawestin.”
