Bi îdiaya “endamtiya rêxistinê” li Tacettîn Kalgi 10 sal û 6 meh cezayê hepsê hatibû birîn. Dadgeha Îstînafê ceza erê kir û derbarê Kalgi de biryara girtinê da. Li Midûriyeta Polîsan a Siwêregê îşkence li Kalgi hat kirin. Parêzerê ku îşkenceyê belge kir bi êrişê re rû bi rû ma.
Dadgeha Rihayê bi îdiaya “endamtiya rêxistinê” 10 sal û 6 meh cezayê hepsê li Tacettîn Kalgi birîbû. Ev ceza ji aliyê Dadgeha Herêmî ya Dîlokê ve hat erêkirin. Li gorî nûçeya Ajansa Mezopotamyayê; ji ber vê yekê polîsan avêt ser mala Kalgi û ew binçav kirin. Derket holê ku li Midûriyeta Polîsan a Siwêregê îşkence li Kalgi hatiye kirin.
Kalgi yê ku di çarçoveya lêpirsîna Serdozgeriya Komarê ya Sêwregê di sala 2015an da bi îdiaya “endamtiya rêxistinê” hatibû binçavkirin, piştî îfadeya wî hatibû girtin hatibû berdan. Piştî îdianameya hat amadekirin ji aliyê 1emîn Dadgeha Cezayê Giran a Sêwregê ve hat qebûlkirin, darizandin dest pê kir û di dawiya darizandinê de, di 31ê Adara 2021an de bi heman îdiayê 10 sal û 6 meh cezayê girtîgehê li Kalgî hat birîn.
Biryara ku di heman salê de sewqî Dadgeha Herêmî ya Dîlokê hat kirin, di 18ê Nîsana 2022yan de ji aliyê dadgehê ve hat pesendkirin. Piştî vê derbarê Kalgi de biryara girtinê hat dayîn.
Gava dosye ji Dadgeha Bilind re hat şandin, Kalgi hat binçavkirin. Kalgi ku îro danê sibehê li mala xwe ya li Siwêregê hat binçavkirin, birin Midûriyeta Polîsan a Navçeyê.
Polîsan li parêzer xistin
Gava parêzerê Kalgi, Sabrî Gungen çû midûriyeta polîsan cem miwekîlê xwe, derket holê ku îşkence li parêzer jî hatiye kirin. Gungen ê ku wêneyê îşkenceya li dijî miwekîlê xwe kişand, bi tundiya 15 polîsan re rû bi rû ma. Gungen ê ku ji ber lêdana polîsan rapor girt, tevî muwkeîlê xwe Kalgi serî li Serdozgeriya Komarê ya Siwêregê da û giliyê polîsan kir.
Her wiha Tacettin Kalgi yê ku sewqî Edliyeya Siwêregê hat kirin, piştî xwendina biryarê birin Girtîgeha Tîpa T a Siwêregê.
