Mêrdîn – Welatiyên Nisêbînê û Hevşaredara Nisêbînê diyar kirin ku qeyûmê Mêrdînê xizmetê ji gelê Nisêbînê re nake û ji ber nebûna xizmetgûzariyê welatî di nava rewşek şerpeze de man e û li gelek taxan kuçe û kolan di nava heriyê de mane.
Li bajarên mezin xizmeta gel a binerd û sererd an go xizmeta çêkirina kanalîzasyonan û anîna ava vexwarinê di bin kontrola şaredariyên bajarên mezin de ye. Piştî ku di 4ê Mijdara 2024an ji aliyê Wezareta Karên Navxwe ve qeyûm tayînî Şaredariya Bajarê Mezin a Mêrdînê hat kirin, xizmeta ji bo gel jî tê kirin kete asta herî kêm. Li taxa Gundik a navçeya Nisêbîn a Mêrdînê beriya 10 salan hatiye avakirin û ji roja hatiye avakirin heya niha şêniyên taxê ji ber pirsgirêka ava vexwarinê, nebûna xeta kanalîzasyonê û nebûna rêyên taxê bêzar e.
Her ku welatiyên taxê ji bo çaserkirina pirsgirêkên xwe serî li Gerînendetiya Qenal û Avê ya Bajarê Mezin a Mêrdînê (MARSÛ) didin jî qeyûmê Mêrdînê dibêje, “Em ê ê werin lê binêrin” lê piştre li şêniyên taxê venagere. Her wiha li gel ku peywira xizmeta ava vexwarinê û çêkirina xeta kanalîzasyonê ne ya Şaredariya Nisêbînê ye jî qeyûm berê gel dide Şaredariya Nisêbînê û bi vê yekê dixwaze bêtifaqiyê bixe nava gel û şaredariyê.
‘Qey em ne mirov in?’
Welatiyê bi navê Şeyhmûs Keskîn ku beriya niha ji bo çareserkirina pirsgirêkên taxê gelek caran serî li saziyên berpirsyar daye bertek nîşanî MARSÛyê da û wiha axivî: “Taxa me gelekî mezin e lê kesek li halê me napirse. MARSÛ nayê taxê û karê xwe nake. Ma qey em ne mirov in. Îro welatî nikarin bi rehetî li taxê bigerin, zarok nikarin biçin dibistanê. Ev ne peywira Şaredariya Nisêbînê ye ku were çareser bike.”
‘Ji ber qeyûm şaredariya gel nikare xebat bike’
Keyayê taxê Nevzet Akinci jî bang li qeyûm kir ku were xizmeta taxê bike û wiha got: “Em dixwazin her kes bibine ku em di çi halî de ne. Pirsgirêka me ya herî mezin xebatên taxê yên binerd in, ji ber ku xebatên binerd nayên kirin Şaredariya Nisêbînê nikare xebatên ser erd jî bike. Em dixwazin bajarê mezin were pirsgirêkê çareser bike. Miletê me perîşan bûye.”
Xemsariya qeyûm dest û lingên Şaredariya Nisêbînê girê dide
Hevşaredara Nisêbînê Gulbîn Şahîn Daghan jî diyar kir ku ew ji ber qeyûm nikarin xizmeta gelê Nisêbînê bikin û got: “Dema em hatin ser kar, taxên ku pirsgirêka wan a karên binerd nebû me rêyên wan çêkirin lê li taxa me ya Gundik hem pirsgirêka avê heye hem jî pirsgirêka xeta kanalîzasyonê heye. Ji ber wê em nikarin rêyên taxê çêbikin. Her ku em vê yekê ji qeyûm re radigihînin jî pirsgirêkê çareser nake û dest û lingên me girê dide.”
‘Ji ber rewşa taxê em fedî dikin’
Gulbîn Şahîn Daghan da zanîn ku ji ber van pirsgirêkên qeyûm û rewşa gel têde ye ew fedî dikin û axaftina xwe wiha berdewam kir: “Bi rastî ji ber vê rewşa taxê em jî şerm dikin. Ji ber ku qeyûm karê xwe yên xebatên binerd nake em jî bikaribin kolanan çêbikin. Niha ji bo çêkirina kolanan me her tişt amade kiriye lê xetên avê û xetên kanalîzasyonê qeyûm çênake û em jî nikarin dest bi karê xwe bikin.”
Ger MARSÛ karê xwe neke bila şaxa xwe ji Nisêbînê rake
Gunbîn Şahîn Daghan herî dawî bang li qeyûm ku kir ger karê xwe neke bila gerînendetiyên xwe ji Nisêbînê rake û axaftina xwe wiha bi dawî kir: “Ger MARSÛ karê xwe neke bila şaxa xwe ji Nisêbînê rake. Ger bêjin em nikarin vî karî bikin bila ji me re berdin em ê bi derfetên xwe vê yeke bikin. Bila peywîrê ji ser milê xwe rakin û bidin me wê demê em ê hewl bidin hemû pirsgirêkên gel çareser bikin.”
