Şirnex – Rêvebera Rêxistina Mafên Mirovan a Sûriyeyê Evîn Cuma diyar kir ku Tirkiye zarok û jin jî di nav de welatiyên sivîl dikuje û got: “Me raporên ku amade kirin, ji komîte û meclisa mafê mirovan re şandin. Em ê bi van raporan serî li dadgehên navneteweyî bidin û giliyê Tirkiyeyê bikin ku ji sûcê şer bê darizandin.”
Li Bakur û Rojhilatê Sûriyeyê êrişên Tirkiye û komên çekdar ên giredayî wê zêdetirî 40 rojin berdewam dike. Gelên Bakur û Rojhilatê Sûriyeyê li dijî êrîşên Tirkiyeyê yên li dijî Bendava Tişrînê di 8ê çile de berê xwe dan bendava Tişrinê û li vir dest bi çalakiya nobedê kirine. Nobeta ku di 8ê çile de dest pê kiriye 12 rojin didome. Gel li dijî êrîşan xwe kiriye mertalên zindî û li ber xwe dide. Heta niha Tirkiyeyê bi SÎHA û ÎHAan gelek caran êrîş pêk anî. Di êrîşan de 12 kes hatin kuştin û 70 kes birîndar bûn. Êrişên Tirkiyeyê yên li dijî bendavê didomin. Lê li aliyê din ji bo parastinê nobet jî didome. Tirkiyeyê di 18ê çile de dîsa erîşî sivîlan kir û 4 sivîl kuştin. welatiyan jiyana xwe ji dest da û 15 welatî jî birîndar bûn. Tirkiye bi êrişa li dijî welatiyên sivîl û cihên xizmetguzeriyê sûcên şer dike. Rêvebera Rêxistina Mafê Mirovan a Suriyeyê Evîn Cuma tekildarî sûcên şer ên li dijî herême ji Ajansa Welat re axivî.
‘Tirkiye sivîlan dikuje’
Evîn Cuma anî ziman ku Tirkiye di êrişan de sivîlan dike hedef û got: “Me ev sûcên şer ên li herêmê kirine rapor.” Evîn Cuma anî ziman ku şerê li dijî herême didome û wiha axivî: “Li aliyekî sivîlan dikujin, li aliyê din welatiyan bi darê zorê didin koçberkirin. Bi dron û balafîrên şer welatiyên sivîl dikujin. Li her derê Bakur û Rojhilatê Suriyeyê bi diron û balafîrên şer êrîşî sivîlan dikin. Taybet jî li bendava Tişrînê di şerê ku diqewimê de sûcên li dijî mirovî pêk tên. Bendava Tişrînê cihê ku pêdiviya av û ceyrana herême dabin dike ye. Kesên sivîl dema li dijî vê yekê dertên û ji bo êrişên li ser bendavê rawestin berê xwe didin Tişrînê rastî êrîşan tên û tên kuştin. Ne tenê welatiyên sivîl ambulansan jî dikin hedef. Zarok, jin û gelek kes di van êrişan de hatin kuştin. Li vir komkujî pêk tê. Av û ceyrana welatiyan kirin hedefa xwe. Li gor zagona navneteweyî jî weke qîrkirineke li dijî mirovî tê pênasekirin û yek jî sûcê şer e.”
‘Divê hêzên navdewletî zorê li Tirkiyeyê bikin’
Evîn Cuma di berdewama axaftina xwe de bi lêv kir ku li dijî sûcên şer ên ji aliyê Tirkiyeyê vê pêk tên rapor amadekirine û dê serî li Dadgehên Navneteweyî bidin. Evîn Cuma destnîşan kir ku divê Tirkiye bê darizandin û wiha pêde çû: “Ji aliyê qanûnî û belgeyan de me xebat dan meşandin û gelek dane jî tomar kirin. Me ji Komîte û meclîsa mafê mirovan re raporên ku amadekirinê şandin. Bi wan raporan ve wê serî li dadgehên navneteweyî be dayin ku Tirkiye ji ber van sûcên şer bê darizandin. Darizandin wê li dijî kesên ku ew sûc pêk anîne pêk were. Lê ew bi tenê serê xwe ter nake. Divê zext li Tirkiyeyê bê kirin ku pêşî li van binpêkirinan bigrin. Divê saziyên navneteweyî jî bi erka xwe rabin ser pêyan. Dewletên navneteweyî dema dixwazin zext dikin. Lê niha jî ji bo rawestandina van sûcan divê dewletên navneteweyî zextê li Tirkiyeyê bikin.”
Bang li saziyên navneteweyî
Evîn Cuma balkişand ser xetereyên li ser bendava Tişrînê û wiha bi dawî kir: “Bi hezaran kes li dijî êrişên li ser bendava Tişrînê ne û rastî êrişan tên. Ew êriş xetereyên mezin derdixînin hole. Heke bendava Tişrînê biteqe dê ji bo hemû welatiyên herême xetereyên jiyanî derxîne. Heke welatiyên sivîl bi vî awayî bên kuştin û pêşî li vê yekê neyê girtin dê keraseteke mezin pêk bê. Dema em bi saziyên navneteweyî re dikevin tekiliyê û raporan ji wan re dişinin ew jî dibêjin em xetereyeke mezin dibinin. Yên ku van sûcên dewleta tirk derdixînin holê jî weke Nazim Daştan û Cîhan Bîlgîn dibin hedef û tên kuştin. Niha jî êriş li dijî rojnamegeran heye ku van sûcan nişan nedin. Banga me li hemû saziyên navneteweyî ew e ku li dijî van sûcên şer bikevin hewldanan. Ji bo Tirkiye li dadgehên navneteweyî bê cezakirin divê hemû kes dengê xwe derxîne. Ewlehiya herême bê girtin.”
