Şaredariya Peyasê ragihandin ku hin kesên nebaş bi rêya telefonê bang li welatiyan dikin, navê alîkarên hevşaredaran bikar tînin û bi vê yekê pere dixwazin. Şaredariyê der barê hewldanên sextekariyê de gel hişyar kir.
Şaredariya Peyasê ya Amedê li ser navê hevşaredaran daxuyanî da. Di daxuyaniyê de ev işt hatin gotin: “Di rojên dawî de, hin kesên nebaş bi rêya telefonê bangî welatiyan dikin, navê alîkarên Şaredariya Peyasê bikar tînin û bi vî awayî alîkariya madî dixwazin. Me der barê vê yekê de agahî ji welatiyan wergirtine.”
Şaredariyê diyar kir ku welatî divê li hemberî van hewldanên xapandinê hişyar bin û bi baldarî tevbigerin, da ku neyÊn lîstika sextekaran. Di daxuyaniyê de ev tişt hat gotin: “Li ser navê Alîkarên Hevşaredarên Şaredariya Peyasê tu daxwazeke pereyan ji kes an saziyan nayê kirin û nehatiye kirin.”
Her wiha, şaredariyê daxwaz kir ku ger daxwazên bi vî rengî yên nefermî çêbibin, bila welatî guh nedin wan û tavilê şaredariyê agahdar bikin. Şaredariya Peyasê bi vê daxuyaniyê ji raya giştî re ragihand ku welatî divê tedbîrên pêwîst bigirin da ku nebin qurbaniyên sextekariyê.
