Sêrt – Piştî Walîtiya Şirnexê, Walîtiya Sêrtê jî ji bo birîna daristanan îhale pêk aniye. Cerdevanên ku li gundê Omyanisê yê navçeya Berwariyê ya Sêrtê daristanan dibirin li gundiyan geriyane û gefan li şêniyên gund xwarin e.
Li Kurdistanê bi salan exweza tê talankirin. Di salên dawî de herêmên ku daristan lê hene, bi hinceta “ewlehiyê” dar tên birîn. Bi taybetî li Herêma Botanê ev talan ji çar aliyan ve didome. Bi salan e cerdevan di bin kontrola leşkeran de ketine nava Herêma Bestayê û talanê dikin.
Niha jî Walîtiya Sêrtê birîna daristanan daye îhaleyê
Beriya niha derketibû holê ku Walîtiya Şirnexê birîna daristanan dide îhaleyê û van îhaleyan jî cerdevan werdigirin. Niha jî Walîtiya Sêrtê ji bo birîna daristanên Herêma Besta ya dikeve nav tixûbên navçeya Berwariyê ya Sêrtê û îhaleya birînda daran dide. Ev îhale jî cerdevanên gundê Hosyanê stendin e.
Sercerdevan gef li gundiyan xwariye
Çavkaniyên xwecihî diyar kirin ku birîna daristanan ji aliyê sercerdevanên bi navê Medenî Bîlen û Mehmet Bîlen ve pêk tê. Gundiyan giliyê birîna daristanên xwe kirin e. Li gorî agahiyên hatine bidestxistin sercerdevan Medenî Bîlen li hin şêniyên gundê Omyanisê yê Berwariyê geriyaye û ev gef li wan xwariye, “Ev ji were namîne.”
Gerînendeyê Daristanan ê Sêrtê: Îhaleya birîna daristanan me pêk aniye
Gerînendeyê Karên Çandînî û Daristanan ê Sêrtê ku me bi rêya telefonê xwe gihandê, got ku wan ji bo birîna daristanan îhale pêk aniye. Li ser pirsa me ya qada we derxistiye îhaleyê çend hektar e, gerinende got, “ez nikarim derbarê vê yekê de agahî bidim we.” Gerînende pirsa derbarê kesên îhale wergirtine de jî bersiv neda û telefon qut kir.
‘Ne ji bo ewlehiyê ji bo rantê daristanan talan dikin’
Şêniyê gundê Omyanisê yê navçeya Berwariya Sêrtê Galîb Kulter da zanîn ku bi salan e daristanên gundê wan tên birîn û wiha nerazîbûn nîşan da: “Bi salan e bêyî vîna gundiyên me daristanan dibirin. Niha jî bi qasî kîlometreyekî nêzî gund bûne. Qaşo dibêjin ji ber ewlehiyê ye, lê ev yek ne rast e. Ji ber rantê daristanên me dibirin. Birîna daristanan derxistine îhaleyê, lê kesên îhale girtine derketine derveyî qada îhaleyê û li gor serê xwe daristanan dibirin. Em weke şêniyên gund vê yeke qebûl nakin û me ji bo sekna talanê serî li Walîtiya Sêrtê daye.”
Deverên ku dane îhaleyê û daristan lê tên birîn ev in: Devera Tenîre, Xwara Serdikê, Xwara Seîd, Gera Wirwiro.
