Stenbol – Endamên TEV-KOMê ku ji bo xebatên têkildarî ziman di bin sîwana TEV-KOMê de hatin cev hev, balkişandin ser polîtîkayên asîmîlasyonê yên li dijî Kurdî û destnîşan kirin ku ji bo Kurdî bibe zimanê fermî û pêş bikeve dê xebatên xwe mezin bikin.
Tevgera Komaleyên Xwendekaran a Çand û Zimanê Kurdî (TEV-KOM) bi deklerasyonekî damezrandina xwe li Navenda Çandê ya Yaşar Kemal a Maltepeyê ya Stenbolê ragihand. Bi dehan kom û qlûbên zimanê Kurdî yên zanîngehan hatin gel hev. Xwendekarên ku tev li bernameya ragihandinê bûn ji ajansa me re axivîn.
‘Divê ciwan li dijî asîmîlasyonê baldar bin’
Fatma Gunduz diyar kir ku li zanîngehan komên Kurdî hebûn û bi sîwana TEV-KOMê ev hatin gel hev û wiha axivî: “Bi TEV-KOMê dê xebatên me jî xurttir bibin. Em ciwanan di nava civakê de wekî hêza herî xurt dibînin. Pêşeroja civakê jî ciwan ava dikin. Ji ber vê jî vê xebata ziman jî niha ciwan pêş dixin. Herî zêde jî jinên ciwan di nav xebatê de cih digirin. Em dizanin pergal ji bo civakê asîmîle bike polîtîkayên xwe li ser ciwan û jinan dimeşîne. Li dijî polîtikayên bişaftinê divê ciwan baldar bin.”
‘Em dixwazin Kurdî bibe zimanê fermî’
Di berdewama axaftina xwe de Gunduz bi bîr xist ku ciwan her tim pêşengtiya civakê kiriye û wiha domand: “Di dîrokê de jî diyar e ku ciwan pêşengên civakê ne. Îro TEV-KOM jî ji bo wê tê avakirin. Em dixwazin ku zimanê Kurdî bibe zimanê fermî. Di dibistan û zanîngehan de bibe zimanê dersan. Divê zimanê Kurdî bibe zimanê di hemû qadên zanistê de bê bikaranîn. TEV-KOM statûyê ji zimanê Kurdî re dixwaze. Xebatên me ji bo vê dê bimeşin.”
‘Em dixwazin bi zimanê xwe azad bijîn’
Endamê METU-KURDÎ Jiyan Bahadir jî bi bîr xist ji ber ku ew dizanin bi hev re hêztir in, hatine gel hev û ev tişt anî ziman: “Em dê bi hev re xurttir ji bo çand û zimanê xwe bixebitin. Ev saleke em li ODTUyê xebatên ziman û çandî dimeşînin. Bi TEV-KOMê em dê xebatên xwe xurttir bikin. Ji niha şûnde em wekî TEV-KOMê dê ji bo zimanê xwe zêdetir bixebitin. Em ji bo zimanê Kurdî azadiyê dixwazin. Em dixwazin bi ziman û çanda xwe azad bijîn.”
‘Em dê ji bo pêşxistina ziman koman ava bikin’
Xwendekar Fatîh Demîrboga jî destnîşan kir ku TEV-KOM ji bo xwedî derketina ziman û çanda Kurdî hatiye avakirin û got: “Îro ciwanên zanîngehan hatin gel hev. Em dixwazin zimanê xwe pêş bixin. Bi dehan komên zanîngehan ji bo zimanê Kurdî hatine gel hev û bi sîwana TEV-KOMê xwedî li zimanê xwe derdikevin. Em dê ji bo zimanê Kurdî pêş bixin di zanîngehan de koman avabikin.”
