TJAyê li dijî êrişên li ser taxên Şêxmeqsûd û Eşrefiyê pêk tên bertek nîşan da û got: “Em bang li her kesê ku bi têkoşîn û berxwedanê li dijî êrişên rejîma Şamê bêdeng nemînin. Em êrişên paşverû û dijminatiya jinan qebûl nakin.”
Komên çete yên girêdayî hikûmeta demkî ya Şamê û Tirkiyeyê li dijî taxên Kurdan Şêxmeqsûd, Eşrefiyê û Benî Zêd ên Helebê êrişên giran pêk tînin. Tevgera Jinên Azad (TJA) li dijî êrişan daxuyaniyek nivîskî belav kir û bertek nîşanî êrişan da.
TJAyê di daxuyaniya xwe de diyar kir ku bi awayekî lezgînî divê êrişên hikûmeta demkî ya Şamê yên li dijî taxên Kurdan pêk tên, werin rawestindain û wiha hate gotin: “Di êrişên rejîma Şamê yên ku du roj in li taxên Şêxmeqsûd, Eşrefiye yên li Helebê û her wiha êrişên li ser Benî Zeydê de li gor agahiyên Çavderiyên Mafê Mirovan ên Suriyeyê (SOHR) 9 sivîl hatin qetilkirin û 60 kes jî birîndar bûn.Ev êrişên rejîma Şamê gefên eşkere yên li ser yekparçeyiya îdarî û siyasî ya Sûriyeyê, û her wiha gefek mezin a li ser rêveberiya xweser a demokratîk a wekhev a ku bi berxwedana gel a bi pêşengiya jinan li Rojava hatiye damezrandin.”
‘Êriş hevgirtina civakî hedef digirin’
TJAyê di daxuyaniyê de bal kişand ser Peymana 10ê Adarê ya di navbera HSD û hikûmeta demkî ya Şamê de hat îmzekirin û di daxuyaniyê de ev yek hate gotin: “Hewceye bêgotin ku li gorî Peymana 10ê Adarê ya di navbera HSD û hikûmeta demkî ya Şamê de hat îmzekirin de, HSD di Nîsana 2025an de ji taxên Kurdan vekişiyan û ewlehiya van taxan ji radestî rayedarên herêmî kiribû.Ev êrişên hikûmeta demkî ya Şamê, vê peymana 10 Adara 2025an vala derdixe. Ev êriş nîşan didin ku rêxistineke civakî ya ku jin aktorên sereke ne hedef digire, şer li ser gelê Kurd ferz dike û bi vî awayî pêşeroja Sûriyeyê tehdît dike. Modela Rojava tê zanîn ku li dijî feraseta serdest û kevneşopiya milîtarîst azadiya jinan têxê navenda xwe û her wiha mînakeke ku bi berdelên giranbûha hatiye avakirin.Ji ber vê yekê, hedefgirtina Rojava ji aliyê komên xwedî îdeolojiyên dijminê jinan ên mîna HTŞ’ê ve, êrişeke îdeolojîk a zelal û hedefgirtî nîşan dide ku rasterast armanc dike ku xeta azadiyê ji holê rake.”
‘Divê li Sûriyeyê hikûmeteke hevbeş mîsoger bibe’
TJAyê di daxuyaniya xwe de anî ziman ku bi tu awayî zîhnîyeta êrişkar, paşverû, dijminê jinan û wêrankar qebûl nakin û dê xeta azadiya jinan biparêzin û di daxuyaniyê de wiha hate gotin: “Wek Tevgera Jinên Azad, em vê zîhniyeta êrişkar, paşverû, dijminê jinan û wêranker bi ti awayî qebûl nakin; em radigihînin ku bi çi awayî be bila bibe, em ê li dijî wê bisekinin û bi vî awayî xeta azadiya jinan biparêzin. Em diyar dikin ku bidawîkirina kaos û tevliheviya li Sûriyeyê bi avakirina hikûmeteke hevbeş ve girêdayî ye ku mafên wekhev û demokratîk ji bo hemû gelên li Sûriyeyê mÎsoger bike û em bang li her kesê ku baweriya xwe bi têkoşîn û berxwedana jinan tîne û ji bo wê li ber xwe dide ku li dijî êrişên rejîma Şamê bêdeng nemînin, helwesteke xurt bigirin û piştgiriyê bidin şoreşa jinan.”
