TMMOBa Çewlîgê bi boneya salvegera erdheja 1ê Gulana 2003yan a Çewlîgê bi beşdariya gelek kesan panelek li dar xist.
Lijneya rêveberiya TMMOBê ya Çewlîgê bi boneya salvegera erdheja 1ê Gulana 2003yan a Çewlîgê panelek li dar xist. Ji Dersim, Amed û Çewlîgê pispor û gelek welatî beşdarî panelê bûn. Di panelê de erdheja ku li Çewlîgê tê payîn û piştî erdhejê hatin nirxandin.
Sekreterê TMMOBê yê Çewlîgê Canfîda Boldaş di panelê de axivî û got: “Em 23 saliya erdheja 1ê Gulanê ya Çewlîgê li pey xwe dihêlin. Di 1ê Gulana 2003yan de li Çewlîgê bi pişeya 6.4 erdhejek çêbû; 177 canên me jiyana xwe ji dest dan û zêdetirî 500 welatiyên me birîndar bûn. Ji wê rojê heta îro, ji bo têkoşîna li dijî erdhejê bi wateya rastî hîna gavek nehatiye avêtin. Niha ne tenê rayedarên neteweyî, yên navneteweyî jî balê dikişînin ser erdheja Çewlîgê, tevî vê yekê nêzikatiya saziyên cemaweriyê ya li Tirkiyeyê bi rastî xemgîn e. Heke li vir erdhejeke ji nişka ve çêbibe, dibe ku bi hezaran welatiyên me jiyana xwe ji dest bidin. Ji bo pêşî li van hemûyan bê girtin û Çewlîg ji erdhejê re bê amadekirin, hewcedarî bi aqilekî hevpar heye. Heke em îro bipirsin ‘Gelo Çewlîg ji erdhejê re amade ye? Nexêr, ne amade ye. Pêvajoyên amadekirina Çewlîgê ya ji bo erdhejê, divê li gorî zanist û teknîkê bin û zanistê ji xwe re bikin bingeh. Wekî Koordînasyona Bajar a TMMOBê, em ji vir careke din bang li saziyên peywendîdar dikin: Em dixwazin di pêvajoya amadekirina Çewlîgê de kedê bidin û di payeya ‘aqilê hevpar a Çewlîgê’ de bigihêjin hev.”
‘Divê em jiyanek ewle ava bikin’
Hevserokê Odeya Mîmaran a Amedê Şerefhan Aydin jî der barê erdheja Çewlîgê û divê çi amadekarî bê kirin de axivî û ev tişt anî ziman: “Wek em dizanin dîsa di rojevê de îhtîmala erdhejek mezin li Çewlîqê heye. Em jî hatin li vir. Ji bo bîranîna erdheja 1ê Gulana 2003yan panelek hat lidarxistin û em jî tevlê bun. Ji bo hişmendiyek çêbibe, hişmendiya bajar û jiyanek ewle û welatek ewle çêbibe li ser vê esasê em li vir in. Heger em bajarê xwe li gor zagonan amade û ava bikin em dizanin ku zanist û teknîk dê bajaran diparêze. Bajarê me bi vî rengî werin ava kirin êdî tu kesekî bi hêsanî namirin û nayên koçber kirin. Ji ber vê dibê em jiyanek ewle ava bikin.”
Piştî panelê, li Meydana Bajar a Çewlîgê wekî sembolîk qaranfîl hatin danîn.
